मकवानपुर, २० चैत । तीन नम्बर प्रदेश सरकारले छिमेकी प्रदेश २ मा हावाहुरीका कारण विपत्तिमा परेका बारा र पर्साका नागरिकलाई एक करोड रुपैयाँ सहयोग गर्ने निर्णय गरेको छ ।
प्रदेश ३ को मंगलबार बिहान बसेको मन्त्रिपरिषदको बैठकले छिमेकी प्रदेशमा विपत्तिमा परेका नागरिहरुलाई सहयोग पुग्नेगरी एक करोड रुपैयाँ दिने निर्णय गरेको हो । यो समाचार हिमालय टाइम्स दैनिकमा लेखेको छ ।
प्रदेश नम्बर २ को बारा र पर्सामा हावाहुरीका कारण घरबारविहीन परिवारको आवास निर्माण गर्नका लागि एक करोड रुपैयाँ सहयोग गर्ने निणय गरिएको प्रदेश सरकारका प्रवक्ता तथा आर्थिक मामिला तथा योजना मन्त्री कैलाश प्रसाद ढुंगेलले बताए ।
सोमबार मात्रै मुख्यमन्त्री पौडेल, आन्तरिक मामिला तथा कानुन मन्त्री शालिकराम जमरकटेल, सामाजिक बिकाश मन्त्री युवराज दुलाल हावाहुरीका कारण ध्वस्त भएको बारा र पर्सा जिल्लामा स्थलगत रुपमा निरीक्षण गरेका थिए । यसैगरी हावाहुरी पीडितलाई प्रदेश तीनकै सांसदहरुले तीन दिनको तलब दिने निर्णय गरेका छन् ।
हावा हुरीका कारण विपत्तिमा परेका बारा र पर्सा जिल्लाका नागरिकका लागि प्रदेश नम्बर ३ का सांसदहरुले पनि सहयोग गर्ने भएका हुन् ।आइतबार साँझ आएको हावाहुरीबाट २९ जनाले ज्यान गुमाएका थिए भने ४०० जनाभन्दा बढी घाइते भएका छन् ।
