काठमाडौं, १५ फागुन । नाइजेरियाको राष्ट्रपति पदमा भएको निर्वाचनमा मोहम्मद बुहारी दोस्रो कार्यकालका लागि निर्वाचित भएका छन् ।
गत शनिबार भएको निर्वाचनमा राष्ट्रपति बुहारी चार वर्षे दोस्रो कार्यकालका लागि पुनः निर्वाचित भएका हुन् । ७६ वर्षीय बुहारीले पूर्व उपराष्ट्रपति अटिकु अबुबाकरलाई पराजित गरेका हुन् ।अबुबाकरको पिपुल्स डेमोक्रेटिक पार्टीले भने निर्वाचन परिणामलाई अस्वीकार गरेको छ ।
हिंसा फैलाएर निर्वाचन गराइएको र मतगणनामा समेत ढिलाइ गरिएकोले निर्वाचन निष्पक्ष नभएको भन्दै विपक्षी दलले परिणाम अस्वीकार गरेको हो । निर्वाचन आयोगले बुहारीको अल प्रोग्रेसिभ कंग्रेस पार्टीले ३६ मध्ये १९ प्रान्तमा जित हासिल गरेको जनाएको छ । विपक्षी डेमोक्रेटिक पार्टी भने राजधानी अबुजासहित १७ प्रान्तमा विजयी भएको छ ।
