काठमाण्डौँ, १२ भदौ । प्रधानमन्त्री शेरबहादुर देउवाले आफ्नो भारत भ्रमणबाट दुर्इृ देशबीचको विश्वासको अभिवृद्धि भएको बताएका छन् ।
भारत भ्रमणबाट आईतबार फर्किएका देउवाले सोमबार व्यवस्थापिका संसदको बैठकलाई संबोधन गर्दै यस्तो जानकारी दिएका हुन् ।
भारतसँग सीमा क्षेत्रमा हुने बाढी तथा डुबानको दीर्घकालिन समस्या समाधानका लागि विज्ञहरुको टोली खटाउने सहमति भएको प्रधानमन्त्री शेरबहादुर देउवाले जानकारी दिएका छन् ।
नेपालको संविधानको कार्यान्वय, स्वीकार्यता नितान्त नेपाल र नेपाली जनताको आन्तरिक विषय भएको जानकारी दिँदै यसको सर्वस्वीकार्यता कायम गर्नु राष्ट्रिय एजेण्डा भएको प्रधानमन्त्री देउवाले बताए ।
राष्ट्रिय प्राथमिकताको एजेण्डा बारे राष्ट्रिय, अन्तराष्ट्रिय जगतलाई जानकारी गराउनु अस्वभाविक र स्वभाविक विषय नभएको भन्दै नेपालको शान्ति प्रक्रिया, लोकतन्त्रको संक्रमणमा सघाई आएको छिमेकीले नेपालको पछिल्लो राजनीतिक घटनाबारे जिज्ञासा राख्नुलाई नाजायज भन्न नमिल्ने प्रधानमन्त्री देउवाले दाबी गरे । सम्बोधनकै क्रममा देउवाले नेपालको संविधानको कार्यन्वयनमा छिमेकी वा अन्य कुनै मुलुकको हस्तक्षेत स्वीकार्य नहुने समेत स्पष्ट पारे ।
भारतसँग विगतमा सहमति भएका ठूला आयोजनाहरुको शीघ्र कार्यन्वयन हुने विश्वास समेत देउवाले व्यक्त गरे । प्रधानमन्त्री देउवाले भारत भ्रमणका क्रममा दिएको अभिव्यक्ति अहिले विवादमा तानिएको छ । सोही विषयलाई लिएर सञ्चारमाध्यममा आएको टिप्पणी प्रति आफ्नो ध्यानाकर्षण भएको पनि उनले बताए ।
