पुष्कर भट्ट
कञ्चनपुर, २० साउन । कञ्चनपुरमा चार महिनाको अवधिमा ८ वटा बलात्कारका घटना भएका छन् । साउन महिनामा मात्रै चार वटा घटना घटेको छ । जसमध्ये दुई वटा बलात्कारपछि हत्या गरिएको छ । बलात्कारका घटना बढ्दै गएपछि सुरक्षाको माग गर्दै स्थानीय आन्दोलित भएका छन् ।
कञ्चनपुरमा चार महिनाको अवधिमा ८ वटा बलात्कारका घटना भएका छन् । जसमध्ये २ वटा बलात्कारपछि हत्या गरिएको छ भने चार वटा बलात्कारको प्रयास भएका छन् । साउन १० गते कञ्चनपुरको भीमदत्त नगरपालिका–२ महुलियाकी निर्मला पन्तको बलात्कारपछि हत्या भयो । उनको हत्यामा संलग्नहरु अहिलेसम्म पत्ता लाग्न सकेको छैन ।
त्यस्तै साउन ९ गते कञ्चनपुरमै शुक्लाफाँटा नगरपालिकामा एक २० वर्षिया महिला बालात्कृत भइन् । साउन १९ गते भिमदत्त १० जिमुवामा पाँच बर्षिया बालिकालाई हजुरबुवा नाता पर्ने लक्ष्मण कोलीले बलात्कारको प्रयास गरे । साउन ४ गते पुनर्वास नगरपालिकामा नौं वर्षिया बालिका बलात्कृत भईन् ।
असार २६ गते बेपत्ता भएकी कृष्णपुर नगरपालिका ८ शान्तिपुरकी १७ वर्षीया कविता लालझाडी संरक्षित वनभित्रको अमखैया खोलामा मृत अवस्थामा फेला परिन् । उनको पनि बलात्कारपछि हत्या भएको थियो । साउन १ गते ३९ वर्षिया महिला माथि पुनर्वास ६ परासनका ३० वर्षिया नरेश रानाले बलात्कारको प्रयास गरे ।
बैशाखमा भीमदत्त नगरपालिका १० जिमुवामा दुई बालिका बलात्कृत भए । त्यस्तै वैशाखमै कृष्णपुर नगरपालिकाकै एक पुरुषले आफ्नै १४ वर्षीया छोरीको बलात्कार गरे ।
बलात्कारका घटना बढ्दै गएपछि सुरक्षाको माग गर्दै आमा समूह, विद्यार्थी र स्थानीयले बलात्कारका घटनामा संलग्नलाई कारबाहीको माग गर्दै आइतबार बजार बन्द गराएका छन् ।
बलात्कारका घटनामा संलग्नहरुलाई कारबाही नभएको स्थानीयले गुनासो गरेका छन् । बलात्कारमा संलग्नहरुलाई तत्काल पक्राउ गरि कडा कारबाही गर्न उनीहरुले माग गरेका छन् ।
