काठमाडौं, २ भदौ । उपप्रधान तथा परराष्ट्रमन्त्री कृष्णबहादुर महराले संविधान संशोधन विधेयक पारित हुने दावी गरेका छन् । उपप्रधानमन्त्री महराले संविधान संशोधन विधेयक पारित गराउन प्रमुख प्रतिपक्ष एमालेले समेत सहयोग गर्नेमा सरकार आशावादी रहेको बताए ।
शुक्रबार जनकपुर विमानस्थलमा संचारकर्मीहरुसँग संक्षिप्त प्रतिक्रिया दिँदै उनले संविधान संशोधन विधेयक पारित गराउन सरकार लागि परेको स्पष्ट पारे । आगामी सोमबार संसदमा संविधान संशोधन विधेयक निर्णयार्थ पेश हुँदैछ ।
उपप्रधानमन्त्री महराले आगामी असोज २ गते तेस्रो चरणको निर्वाचन हुनेमा शंका नगर्न पनि आग्रह गरे । मन्त्री महराले मंसीर पहिलो साता भित्र प्रदेश सभा र प्रतिनिधि सभा निर्वाचन एउटै मितिमा गराउने गरी सरकारले तयारी गरिरहेको जानकारी दिए ।
