एजेन्सी, २ भदौ । युरोपा लिग फुटबल अन्तर्गत गएराति भएको छनौट खेलमा एभर्टन विजयी भएको छ ।प्ले अफ पहिलो लेगको खेलमा एभर्टनले क्रोएशियाको हाजदक स्प्लिटलाई २–० ले पराजित गरेको हो ।
एभर्टनको जितमा माईकल किन र ईद्रिसा युएले एक–एक गोल गरे । पहिलो लेगमा जितसँगै एभर्टनले युरोपा लिगको समूह चरणमा छनौट हुने सम्भावना बलियो पारेको छ । इभर्टन र हाजदक स्प्लिटबिचको खेल दर्शकका कारण तनावपूर्ण बन्यो । मिचेल केनले हेडमार्फत ३० औँ मिनेटमा गोल गरेर इभर्टनलाई अग्रता दिलाएपछि दर्शकले मैदानमा विभिन्न वस्तु फाल्नुका साथै विज्ञापनका बोर्डमा तोडफोड गरे । दर्शकले मैदानमा नै प्रवेश गर्ने प्रयास गरेपछि खेल ५ मिनेट रोकिएको थियो ।
गएराति भएका अन्य खेलमा इटालीको एसी मिलान, नर्वेको रोजेनबर्ग, मेसेडोनियाको एफके भारदार, साईप्रसको अपोईल लिमासोल, पोर्चुगलको स्पोर्टिङ ब्रागा र रुसको एफके क्रास्नोडार विजयी भएका छन् ।
