साउन २९, रौतहट – लगातारको वर्षापछि जलमग्न बनेको रौतहटको राजपुर फरहदवा चोकमा गाडी डुब्दा गर्भवतीसहित ६ जनाको ज्यान गएको छ ।
जिल्लाको परोरा गाउँपालिका–३ का रामसेवक प्रसाद यादवकी बुहारीलाई सुत्केरी बेथा लागेपछि अस्पताल लैजाँदै गरेको जीप फरहदवा चोकमा बाढीमा डुब्दा चन्दन किशोर यादव, सरोज कुमार यादव, चन्दनकी गर्भवती श्रीमती, आमा, भाउजु र छोरीको ज्यान गएको प्रहरीले जनाएको छ ।
जिल्ला अस्पताल गौरमा सुत्केरी गराउन गइरहेका बेला गर्भवती र आफन्त बोकेको गाडी फरहदवा चोक नजिकै लाल बकैया नदीको बाढीमा डुबेको थियो । ज्यान गुमाउने मध्ये पाँचजना भने एकै परिवारका सदस्य हुन् । जीपका चालक र अन्य एक व्यक्ति भने ज्यान बचाउन सफल भएका छन् ।
