एजेन्सी , २२ चैत । भारतीय चर्चित अभिनेता सलमान खान कालो हरिण शिकार काण्डमा दोषी ठहर भएका छन् । हरिणको शिकार गरेको मामिलामा उनी करिब २० वर्षपछि दोषी ठहर भएका हुन् ।
सन् १९९८ मा जोधपुरको ग्रामिण क्षेत्रमा दुई कालो हरिणको शिकार गरेको आरोपमा सलमानसहित अन्य पाँचजनाविरुद्ध मुद्दा परेको थियो । खानले दुईवटा कालो हरिणलाई एउटा चलचित्रको छायाङ्कनका क्रममा पश्चिम राज्य राजस्थानमा मारेका थिए । उक्त अभियोग लागेका अन्य चार अभिनेताहरूलाई भने जोधपुरस्थित अदालतले निर्दोष साबित गरेको छ ।
खानले अब १ देखि ६ वर्षसम्म जेल सजायको सामना गर्नुपर्ने हुनसक्छ । अहिलेको फैसलाविरुद्ध उनले पुनरावेदन गर्न सक्छन् । यसअघि सन् २००२ मा एकजना घरबार विहीन व्यक्तिलाई गाडीले हानेर भागेको मुद्दामा खानले अदालतबाट सन् २०१५ मा छुटकारा पाएका थिए ।
सलमानलाई जनावर सिकार गरेको अभियोग लागेको यो चौथोपटक हो । यसअघिका तीनवटा मुद्दामा भने उनी निर्दोष साबित भएका थिए ।
