एजेन्सी , २८ फागुन । इङ्लिस प्रिमियर लिगमा टोटेनह्याम तेस्रो स्थानमा उक्लिएको छ । बर्नमाउथलाई ४–१ गोल अन्तरले पराजित गरी टोटेनह्याम तेस्रो स्थानमा उक्लिएको हो । टोटेनह्यामको ३० खेलबाट ६१ अंक भएको छ भने समान खेल खेलेको लिभरपुल १ अंकले पछाडि छ ।
तेस्रो स्थानमा उक्लिने क्रममा टोटेनह्यामले एक गोलले पछि परेको अवस्था उल्टाएर जित दर्ता गरेको हो । बर्नमाउथले खेलको सातौं मिनेटमा स्टानिसलसको गोलमा अग्रता लिएको थियो । टोटेनह्यामले खेलको ३५ औं मिनेटमा बराबरी गोल फर्कायो । पहिलो हाफमा १–१ गोलको बराबरी भएकामा दोस्रो हाफमा टोटेनह्यामका लागि सन हेङ मिनले दुई गरे । टोटेनह्यामले इन्जुरी समयमा अर्को गोल गरेर ४–१ को नतिजा निकालेको हो ।
गएराति नै भएको अर्को खेलमा आर्सनलले वाटफोर्डलाई ३–० गोल अन्तरले पराजित गरेको छ । मुस्ताफीले खेलको आठौं मिनेटमा गोलको खाता खोलेकामा आर्सनलले ५९ र ७७ औं मिनेटमा थप दुई गोल गरेको हो । जितका बाबजुद् आर्सनल छैटौं स्थानमा यथावत छ ।
