काठमाडौं, १९ फागुन । सत्तारुढ नेकपा माओवादी केन्द्रका अध्यक्ष पुष्पकमल दाहालले समृद्धिको अभियान स्थानीय तहबाट सुरु भइसकेको बताएका छन् । वर्तमान सरकारको एकमात्र लक्ष्य आर्थिक विकास रहेको भन्दै दाहालले त्यसको सुरुवात स्थानीय सरकारबाट सुरु भएको बताए ।
कास्कीको अन्नपूर्ण–काठमाडौँ समाजले आज काठमाडौँमा आयोजना गरेको कार्यक्रममा अध्यक्ष दाहालले स्थानीय सरकारलाई संविधानले परम्परागत सेवा प्रवाहको निकायका रूपमा मात्रै सीमित नराखी आर्थिक विकासको एउटा अङ्गकै रूपमा स्थापित गरेको स्मरण गराए । स्थानीय तहको निर्वाचनपछि गाउँ तहमा ३५ हजारभन्दा बढी जननिर्वाचित प्रतिनिधि सक्रिय भएको समृद्धिको अभियान प्रभावकारी हुने दाहालको विश्वास छ ।
अर्को प्रशंगमा दाहालले ढिकुरपोखरीको लिवाडेमा घर बनाउने योजना रहेको बताए । दाहाल विक्रम सम्बत २०११ साल मंसिर ६ गते सोही स्थानमा जन्मिएका हुन् । संरक्षकको भुमिकामा रहन अन्नपूर्ण समाजले गरेको आग्रह स्वीकार्दै दाहालले अन्नपूर्ण गाउँपालिकाको विकास र समृद्धिका लागि सबै मिलेर अघि बढ्नुपर्नेमा उनले जोड दिए ।
