साउदी अरबको सुरक्षाका लागि इजिप्टका सेना महिनौँदेखि तैनाथ

इजिप्टले साउदी अरबको रक्षा क्षमता सुदृढ बनाउन आफ्ना सेना केही महिनादेखि त्यहाँ तैनाथ गरेको जनाएको छ । इजिप्टका विदेशमन्त्री बद्र अब्देलाट्टीले सोमबार फ्रान्सेली सञ्चारमाध्यम फ्रान्स–२४ सँगको अन्तर्वार्तामा इजिप्टका सैनिक साउदी अरबको सुरक्षामा सहयोग पु¥याउन खटिएको बताउनुभएको हो । उहाँकाअनुसार इजिप्टको संसद्ले राष्ट्रपति अब्देल फताह अल–सिसीलाई साउदी अरबको रक्षात्मक क्षमता मजबुत बनाउन आवश्यक कदम चाल्ने अधिकार दिएको छ । ‘साउदी अरबको सुरक्षा इजिप्टको सुरक्षाको पनि हिस्सा हो,’ विदेशमन्त्री अब्देलाट्टीले भन्नुभयो ।
उहाँले इजिप्टको सैन्य सहयोग पूर्ण रूपमा रक्षात्मक रहेको र साउदी अरबको भूभागभित्रै सीमित रहेको स्पष्ट पार्नुभयो । उक्त सहयोग यमनको सीमाभित्र प्रवेश नगर्ने उहाँको भनाइ थियो । यद्यपि, तैनाथ सैनिकको संख्या तथा उपलब्ध गराइएका हतियारबारे उहाँले विस्तृत जानकारी दिनुभएन । इजिप्टको कदमलाई यमनका हुथी विद्रोहीले युद्धको घोषणाका रूपमा लिएको भन्ने प्रश्नमा उहाँले इजिप्टको भूमिका रक्षात्मक मात्रै रहेको दोहो¥याउनुभयो। इजिप्टले सैन्य मुठभेडभन्दा तनाव न्यूनीकरण र राजनीतिक समाधानलाई प्राथमिकता दिएको उहाँले बताउनु भयो । यसैबीच, अमेरिका र इरानबीचको तनावबारे बोल्दै उहाँले सम्भावित सम्झौताका आधारभूत विषयमा दुवै पक्षबीच केही समान धारणा बने पनि त्यसलाई कार्यान्वयन गर्ने चरणबारे मतभेद कायमै रहेको बताउनु भयो । समस्या समाधानका लागि दुवै पक्षले लचकता र सम्झौताको भावना देखाउनुपर्ने उहाँको भनाइ थियो । गत फेब्रुअरी २८ मा इजरायल र अमेरिकाले इरानको राजधानी तेहरानसहित विभिन्न सहरमा संयुक्त आक्रमण गरेका थिए । त्यसको जवाफमा इरानले इजरायल तथा क्षेत्रीय अमेरिकी सैन्य अखडा र सम्पत्तिलाई लक्षित गरी क्षेप्यास्त्र र ड्रोन आक्रमण गरेको थियो । साथै, होर्मुज जलडमरूमध्यमा आफ्नो नियन्त्रण कडा बनाएको थियो ।