गाजामा इजरायली सैन्य कारबाही शुरु भएको तीन वर्ष पूरा भएको अवसरमा शनिवार ग्रीसको राजधानी एथेन्ससहितका विभिन्न सहरमा हजारौं प्रदर्शनकारीले विशाल प्रदर्शन गरेका छन् । विश्वभर आयोजना गरिएको ऐक्यवद्धता दिवसको हिस्साका रूपमा आयोजित उक्त विरोध प्रदर्शनमा विभिन्न ट्रेड युनियन, विद्यार्थी संगठन, राजनीतिक दल र आप्रवासी समुदायको सहभागिता रहेको थियो । एथेन्सको मध्यभागमा भेला भएका प्रदर्शनकारीहरूले इजरायल र संयुक्त राज्य अमेरिकाको दूतावाससम्म मार्च गर्दै युद्ध अन्त्यको माग गरेका थिए । ‘फ्रि प्यालेस्टाइन’ र ‘नरसंहार रोक’ जस्ता नारा लगाउँदै उनीहरूले प्यालेस्टाइनी भूमिको अतिक्रमण अन्त्य र आत्मनिर्णयको अधिकार सुनिश्चित गर्न अन्तर्राष्ट्रिय समुदायलाई दबाब दिएका थिए । प्रदर्शनमा सहभागी नयाँ वामपन्थी दलकी सांसद पेटी पेर्काले तीन वर्षदेखि प्यालेस्टाइनी नागरिकले भोग्नुपरेको भोकमरी र हिंसालाई ‘दुःखद् र त्रासदीपूर्ण’ भनी टिप्पणी गरिन् । उनले भनिन्, ‘विश्वभरका मानिसहरूले यो अन्याय र अन्तर्राष्ट्रिय कानुनको उल्लंघन बुझिरहेका छन् । हामी न्याय नपाउन्जेल सडकबाटै आफ्नो आवाज बुलन्द गरिरहनेछौं । अन्तर्राष्ट्रिय फौजदारी अदालत ९क्ष्ऋऋ० को भूमिकाप्रति हामी आशावादी छौं ।’ सन् २०२३ अक्टोबर ७ मा हमास समूहले इजरायलमाथि गरेको आक्रमणमा करिव १ हजार २ सय जनाको मृत्यु भएको थियो भने २५१ जनालाई बन्धक बनाइएको थियो । त्यसपछिको इजरायली सैन्य कारबाहीमा हालसम्म ७४ हजार भन्दा बढी प्यालेस्टाइनीले ज्यान गुमाइसकेका छन् । यद्यपि गत वर्ष छोटो अवधिको युद्धविराममार्फत केही राहत मिले पनि गाजामा मानवीय संकट अहिले पनि उत्तिकै गम्भीर छ । पुनर्निर्माण, सुरक्षा र दीर्घकालीन राजनीतिक समाधानका मुद्दाहरू भने अझै अन्योलमा रहेका छन् ।
गाजामा युद्धको तीन वर्षः एथेन्समा हजारौंको ऐक्यवद्धता र्याली
