अमेरिकी अन्तरिक्ष संस्था नासाको स्पेस–एक्स ‘क्रू–१२’ मिसन आठ महिना लामो अन्तरिक्ष यात्रा पूरा गर्दै बिहीवार सफलतापूर्वक पृथ्वीमा फर्किएको छ । चार अन्तरिक्षयात्री बोकेको स्पेस–एक्स ड्र्यागन क्याप्सुल क्यालिफोर्नियाको लस एन्जलस नजिकको समुन्द्रमा सुरक्षित अवतरण गरेको हो । नासाकाअनुसार बुधवार बिहान ८ः०५ बजे (पूर्वी समय) अन्तर्राष्ट्रिय अन्तरिक्ष स्टेशनबाट अलग्गिएको स्पेस–एक्स ड्रयागन अन्तरिक्षयानले बिहीवार बिहान ११ः३४ बजे समुन्द्रमा स्प्लास डाउन गर्दै आफ्नो यात्रा बिट मारेको छ । गत फेब्रुअरी १३ मा फ्लोरिडास्थित केप क्यानाभेरल स्पेस फोर्स स्टेशनबाट प्रक्षेपण गरिएको यो मिसन २३७ दिनसम्म अन्तरिक्षमा सक्रिय रह्यो ।
यस मिसनमा नासाका अन्तरिक्षयात्री जेसिका मीर र ज्याक ह्याथवे, युरोपेली अन्तरिक्ष संस्थाकी सोफी एडेनोट तथा रुसी अन्तरिक्ष संस्था रोस्कोस्मोसका एन्ड्रे फेद्याएभ सहभागी थिए । अन्तरिक्षमा रहँदा उनीहरूले विभिन्न वैज्ञानिक परीक्षण र प्रविधियुक्त प्रदर्शनहरू सम्पन्न गरेका छन् । लामो समयको शून्य गुरुत्वाकर्षण वातावरणमा बिताएर फर्केका चालक दलका सदस्यहरूको अब स्वास्थ्य परीक्षण र पुनस्र्थापना प्रक्रिया शुरु गरिनेछ । यो सफल अवतरणसँगै स्पेस–एक्स र नासाको सहकार्यमा अन्तरिक्ष अन्वेषणको यात्राले अर्को कोशेढुङ्गा पार गरेको छ ।
