हंगेरीको संसदले मंगलवार सर्वोच्च अदालतका पूर्व प्रधानन्यायाधीश एन्ड्रास बाकालाई देशको नयाँ राष्ट्रपतिका रूपमा निर्वाचित गरेको छ । ७३ वर्षीय बाका निर्वाचनका लागि एकमात्र उम्मेदवार थिए । गोप्य मतदानमार्फत सम्पन्न निर्वाचनमा उनले १४० मत प्राप्त गरेका थिए । उनलाई संसदमा दुई–तिहाइ बहुमत रहेको सत्ताधारी तिस्जा पार्टीले उम्मेदवारका रूपमा मनोनयन गरेको थियो । बाकाले आगामी अगस्ट १९ देखि औपचारिक रूपमा आफ्नो कार्यभार सम्हाल्नेछन् । निर्वाचित भएपछि आफ्नो सम्बोधनका क्रममा बाकाले राष्ट्रपतिको हैसियतमा आफूले बहुमत र अल्पमत दुवैको विचारलाई प्रतिनिधित्व गर्ने प्रतिवद्धता व्यक्त गरे । उनले राजनीतिक मतभेदहरूलाई लुकाएर कृत्रिम एकता लाद्नुको सट्टा त्यसलाई स्वीकार गर्दै संवैधानिक शक्ति सन्तुलनको रक्षा गर्ने बताए । हंगेरीको अन्तर्राष्ट्रिय सम्बन्धका विषयमा चर्चा गर्दै उनले भने, ‘विगतका केही वर्षहरूमा हाम्रा कैयौँ अन्तर्राष्ट्रिय मित्र राष्ट्रहरूसँगको सम्बन्धमा गिरावट आएको छ । ती साझेदारीहरूलाई पुनः सुदृढ बनाउनु मेरो कार्यकालको मुख्य प्राथमिकता हुनेछ ।’
कानूनी क्षेत्रमा लामो अनुभव सँगालेका बाकाले सन् १९९१ देखि २००८ सम्म युरोपेली मानव अधिकार अदालतमा न्यायाधीशका रूपमा सेवा गरेका थिए । त्यसपछि सन् २००९ मा उनी हंगेरीको सर्वोच्च अदालतको प्रधानन्यायाधीशमा नियुक्त भएका थिए । यद्यपि, तत्कालीन प्रधानमन्त्री भिक्टर ओर्बानको सरकारले ल्याएको न्यायिक सुधारका कारण सन् २०११ को अन्त्यमा उनको छ वर्षे कार्यकाल बीचैमा छोटिएको थियो ।
हंगेरीको संवैधानिक व्यवस्था अनुसार राष्ट्रपतिको कार्यकाल पाँच वर्षको हुन्छ । राष्ट्रपतिले संसदबाट पारित कानूनहरू प्रमाणित गर्ने र राज्यको प्रतिनिधित्व गर्ने जस्ता महत्त्वपूर्ण संवैधानिक दायित्वहरू निर्वाह गर्दछन् । साथै, राष्ट्रपति हंगेरीको सशस्त्र बलको परमाधिपति (कमान्डर–इन–चिफ) समेत रहने प्रावधान छ ।
हंगेरीको राष्ट्रपतिमा सर्वोच्च अदालतका पूर्व प्रधानन्यायाधीश एन्ड्रास बाका निर्वाचित
