काठमाडौँ ।
ओमानको खाडीमा अमेरिकी सेनाले एक तेल ट्याङ्करलाई निष्क्रिय पारेको छ । इरानी बन्दरगाहहरू विरुद्ध जारी अमेरिकी नौसैनिक नाकाबन्दीको उल्लंघन गरेको भन्दै अमेरिकी सुरक्षा बलले लगातार दोस्रो दिन अर्को जहाजमाथि कारबाही गरेको हो । अमेरिकी सेन्ट्रल कमाण्डले बुधबार जारी गरेको विज्ञप्तिअनुसार, पलाउको झण्डा रहेको एम/टी सेटबेल्लो नामक ट्याङ्करका चालक दलले अमेरिकी सेनाको निर्देशन पटक–पटक उल्लंघन गरेपछि अमेरिकी विमानले सो जहाजको इन्जिन कक्षमा प्रिसिजन हतियार प्रहार गरेको थियो । सेन्ट्रल कमाण्डले सामाजिक सञ्जाल एक्समार्फत जानकारी दिँदै उक्त ट्याङ्करले इरानबाट तेल ओसारपसार गर्न खोजेको दाबी गरेको छ । विज्ञप्तिमा उल्लेख भएअनुसार गत अप्रिल १३ देखि नाकाबन्दी शुरु भएयता अमेरिकी सेनाले निर्देशन पालना नगर्ने आठवटा जहाजलाई निष्क्रिय पारिसकेको छ भने १३४ वटा जहाजलाई अन्यत्र मोडिदिएको छ । सोही अवधिमा मानवीय सहायता सामग्री बोकेका ४२ वटा जहाजलाई भने आवतजावतका लागि अनुमति दिइएको कमाण्डले जनाएको छ ।
