एजेन्सी । बंगलादेशको पद्मा नदीमा बुधवार एउटा बस खस्दा मृत्यु हुनेको संख्या २६ पुगेको एक वरिष्ठ अधिकारीले बताएका छन् । यो घटना ढाकाबाट करिव १२५ किलोमिटर दक्षिणमा पर्ने बंगलादेशको राजबारी जिल्लाको एक फेरी टर्मिनलमा भएको हो ।
राजबारीका डेपुटी कमिश्नर र जिल्ला मजिस्ट्रेट सुल्ताना अख्तरले सिन्ह्वासँग टेलिफोनमा कुरा गर्दै बसमा करिव ४० जना यात्रु सवार रहेको जानकारी दिनुभयो । फायर सर्भिसकाअनुसार ढाका जाँदै गरेको उक्त यात्रुवाहक बसले नियन्त्रण गुमाएर पल्टिँदा करिव ८० फिट गहिराइमा डुबेको थियो ।
अधिकारीहरूका अनुसार बस पल्टिएलगत्तै दुईवटा शव फेला परेका थिए । धेरै प्रत्यक्षदर्शीहरूले स्थानीय टेलिभिजन च्यानलहरूलाई बताएअनुसार केवल १० देखि ११ जना यात्रुहरू मात्र पौडिएर किनारमा पुग्न सफल भएका थिए । उनले दुर्घटनाको कारणबारे अनुसन्धान भइरहेको पनि जानकारी दिनुभयो ।
