काठमाडाैं । साउथवेस्टन साहित्य समाजद्वारा आयोजित पिपल चौतारी गजल साँझमा ३० जना स्रष्टाहरुले आ–आफ्ना गजल वाचन गरेका छन्। गत जेठ २३ गते बसुन्धरास्थित साउथवेस्टन स्टेट कलेजमा आयोजित चौतारी गजल साँझमा गजलकारहरुले आफ्ना सिर्जना वाचन गरेका हुन्।
गजल साँझमा विशिष्ठ गजलकारहरु धमेन्द्र ओझा, ललिजन रावल, सन्तोष श्रेष्ठ तथा विदुर तिमल्सिना, विमला दाहाल, सिद्धनारायण आचार्य, देविरमण तिवारी, सङ्गिता थापा, रसिक, विपिन मर्म, देवेन्द्र केसी, दिपेश घिमिरे, अर्जुन अन्योल, सुनिल अधिकारी, भुवन निस्तेज, सुशिला धमला, गणेश खतिवडा, एनबि जनकपुरे, टेकनाथ कोइराला, डा. विष्णु न्यौपाने, गणेश महरा, उदास कार्की, रेणुका भण्डारी लगायतका गजलकारहरूले रचना वाचन गरेका थिए ।
कार्यक्रमका प्रमुख अतिथि रामबहादुर पहाडीले गजलमा सङ्गीत, स्वर र शब्द हुनु पर्नेमा जोड दिनुभयो । कार्यक्रमका विशिष्ट अतिथि शिक्षासेवी एवं साउथवेस्टन स्टेट कलेजका प्रमुख डा. राजेन्द्र केसीले पिपल चौतारी सबैको साझा चौतारी भएको बताउनुभयो ।
गजलकार धर्मेन्द्र ओझाले गजल साहित्यबारे चर्चा गर्नुभएको थियो । गजलमा हाँस्य विधा हुन नहुने भन्दै उहाँले गजलमा संवेदना, हार्दिकता र कोमता हुनुपर्नेमा बताउनुभयो ।
यसैगरी, वरिष्ठ गजलकार ललिजन रावलले प्रणय र प्रेम मात्रै गजल नभइ गजलमा जीवनका विभिन्न पाटा समेटिनु पर्ने बताउनुभयो । सङ्गीतकार सन्तोष श्रेष्ठले लेखनाथ पौड्यालको ‘हे मातृभूमि तिम्रा हामी सबै पुजारी…’ बोलको गजल वाचन गर्नुभएको थियो ।
साउथवेस्टन साहित्य समाजका अध्यक्ष राजेन्द्र लामिछानेको अध्यक्षता सम्पन्न कार्यक्रममा रेणुका भण्डारीले स्वागत मन्तव्य राख्नुभएको थियो भने कार्यक्रमको सञ्चालन गजलकार एच के लामिछानेले गर्नुभएको थियो ।
साउथवेस्टन साहित्य समाजले प्रत्येक वर्ष पिपल चौतारी गजल साँझको आयोजना गर्दै आइरहेको छ ।
