चैत १० आइतबार ।
हिमपात र वर्षाले किसानलाई राहत पुगेको छ । अहिलेका मुख्यबाली गहुँ, जौ, आलुसहित तरकारी र फलफूल खेती गरेका किसानलाई राहत पुगेको हो । यसवर्ष हिउँद निक्कै सुक्खा भएर बित्यो ।अहिले प्रि–मनसुनको बेला देशका कतिपय ठाउँमा मध्यम वर्षा र हिमपात भएको छ ।
हिमाली जिल्ला मुस्ताङको थासाङ,घरपझोङ र मुत्तिनाक्षेत्रमा शनिबार दिउँसो आशिंक वर्षा र हिमपात भएको छ । मुस्ताङको मुक्तिक्षेत्रसहित घरपझोङ र थासाङ गाउँपालिका क्षेत्रमा वर्षा र हिमपात भएको हो ।
फागुनको दोस्रो सातामा उपल्लो मुस्ताङमा आशिंक हिमपात भएको थियो । तर,तल्लो मुस्ताङमा यो सिजन हिमपात हुन सकेको थिएन । ढिलै भएपनि यो वर्षको बेमौसमी वर्षासहितको हिमपातले कृषकले थोरै भएपनि राहत पुगेको कृषि ज्ञान केन्द्र मुस्ताङल् जनाएको छ ।
हिमपात भएपछि पर्यटकीय उच्च क्षेत्रमा आन्तरिक पर्यटकको चहलपहल बढेको पर्यटन व्यवसायीले बताएका छन् । हिजो म्याग्दी, गोरखा, तनहुँ, प्युठान, गुल्मी लगायतका ठाउँमा पानी परेको थियो । गएराति मधेस प्रदेशसहित देशका धेरै ठाउँमा पानी परेको छ । अरू ठाउँको तुलनामा मधेसका सप्तरी, सिरहा, महोत्तरीमा धेरै पानी परेको छ ।
यस्तै काठमाण्डौसहित देशका केही ठाउँमा हावाहुरीसमेत चलेको थियो । आज बिहान पनि मधेससहित पूर्वी तराईका केही ठाउँमा मेघगर्जन र चट्याङसहित हल्का पानी परेको छ । आज दिउँसो कोशी, मधेस, बागमती र गण्डकी प्रदेशमा मौसम आंशिकदेखि साधारणतया बदली रहने र बाँकी ठाउँको मौसम सफा रहने महाशाखाले जनाएको छ ।
आजदेखि पश्चिमबाट मौसममा क्रमिक सुधार हुने जल तथा मौसम पूर्वानुमान महाशाखाले जनाएको छ ।
