फागुन २६ सोमबार ।
नेपाली कांग्रेसका सभापति शेरबहादुर देउवाले राजतन्त्र फर्कने कुनै सम्भावना नरहेको बताएका छन् । कांग्रेसको प्रदेश सम्मेलनको उद्घाटनका लागि धनगढी पुगेका सभापति देउवाले विमानस्थलमा बोल्दै सो कुरा बताएका हुन् ।
उनले राजतन्त्रको पक्षमा माहोल नदेखिएको बताएका हुन् । हिजो काठमाडौंमा राजावादीले गरेको प्रदर्शनबारे बोल्दै सभापति देउवाले हिजो काठमाडौंमा केही नभएकोसमेत बताए । कसैले उचालेर सरकार नउचालिने बताए ।
देउवाले राजतन्त्रका पक्षमा अहिले हल्ला मात्र भइरहेको बताए ।उनले भने, ‘कुनै माहोल मैले देखेको छैन, त्यो हल्ला मात्र हो, हल्ला गरेर केही हुँदैन ।’ उनले दुई पार्टीबिच मिलेर बनेको सरकार ०८४ सम्म जाने र कुनै समस्या नभएको बताए । पूर्वप्रधानमन्त्रीसमेत रहेका सभापति देउवाले सरकार सञ्चालनमा दलहरूबिच कुनै समस्या नरहेको बताएका छन् ।सभापति देउवासहितका नेता पार्टीको सुदूरपश्चिम प्रदेशस्तरीय सम्मेलनमा सहभागी हुन आज धनगढी पुगेका छन् ।
