काठमाडौं,२६ माघ । अख्तियार दुरुपयोग अनुसन्धान आयोगले कैलालीको टीकापुरस्थित टीकापुर नगर विकास समितिको जग्गा हिनामिना अभियोगमा २ सय ४९ विरुद्ध भ्रष्टाचार मुद्दा दायर गरेको छ ।
आयोगले बिहीबार उनीहरुविरुद्ध विशेष अदालत काठमाडौंमा भ्रष्टाचार मुद्दा दायर गरेको हो । टीकापुर नगर विकास समितिका तत्कालीन अध्यक्ष नेत्रप्रसाद जोशी, ललित ताम्राकार, धीजराज रेग्मीसमेतको मिलेमतोमा जग्गा हिनामिना भएको अख्तियारले दायर गरेको अभियोग पत्रमा उल्लेख छ ।
टीकापुर नगरपालिका–१ स्थित टीकापुर नगर विकास समितिका तत्कालीन अध्यक्ष लगायतको मिलोमतोमा नक्कली रसिद बनाई अध्यक्ष पदाधिकारी एवम् कर्मचारीहरुको संलग्नतामा जग्गा प्लटिङ गरेर बदनियतपूर्ण रुपमा रकम उठाइ बेचविखन गरेको खुलेको छ । समितिको स्वामित्वमा रहेको जग्गा व्यक्ति विशेष तथा संघ÷संस्थाहरुलाई वितरण गरी हक हस्तान्तरण गर्दा नगर विकास ऐन, २०४५ तथा नगर विकास निर्देशिका, २०६१ मा भएको व्यवस्थाबमोजिम उपलब्ध गराउनु पर्नेमा त्यसविपरीत नक्कली कागजात खडा गरी व्यक्तिका नाममा हस्तान्तरण भएको अभियोग पत्रमा उल्लेख छ ।
अख्तियारले तत्कालीन सदस्य सचिव अम्बादत्त जोशीविरुद्ध दुई करोड ३० लाख, नापी अधिकृत मानबहादुर चन्दविरुद्ध एक करोड ९० लाख, मालपोत अधिकृत जयबहादुर विष्टविरुद्ध एक करोड ६८ लाख, खरिदार धनिराम भण्डारीविरुद्ध एक करोड ८६ लाख, सबओभरसियर नेत्रबहादुर रावलविरुद्ध एक करोड ७९ लाख रुपैयाँ बिगो र जरिबाना माग गरेको छ ।
