वीरगञ्ज, १४ कात्तिक । बाराको बाल एकता बोर्डिङ स्कुलका सञ्चालक रुपेश सराफको सोमबार गोली हानी हत्या भएको छ । सराफको हत्यामा सम्लग्न भएको आशंकामा एक महिला पक्राउ परेकी छिन् ।
महिलाको नाम भने प्रहरीले सार्वजनिक गरेको छैन् । ती महिला र सराफको नजिकको सम्बन्ध रहेको हुन सक्ने अनुमान गरिएको छ ।
बारा प्रहरीले पूर्व शिक्षिकालाई कलैया बजारबाट पक्राउ गरेको हो । सोमबार दिउँसो उनीमाथि विद्यालय नजिकै गोली प्रहार भएको थियो ।
गोली लागी घाइते सराफको उपचारका क्रममा निधन भएको हो । कलैया घर भएका सराफमाथि २ राउण्ड गोली प्रहार भएको थियो । गोली हान्नेको खोजी भइरहेको प्रहरीले जनाएको छ ।
३५ वर्षीय सराफले विद्यालय सञ्चालनमा निकै मिहेनत गरेका थिए । उनको विद्यालयले प्रगति पनि गर्दै गएको थियो । गत वर्ष मात्र विद्यालयले नयाँ बसहरु खरिद गरेको थियो ।
घटनास्थलमा गोलीको खोका र रगत बगेको देखिएको छ । गोली प्रहार गर्ने ४ जनाको समूह मोटरसाइकलमा आएका थिए । उनीहरुलाई पक्राउ गर्न सीमामा कडाई गरिएको बुझिएको छ ।
