काठमाडौं, १८ साउन । लागूऔषधसहित ४ जनालाई प्रहरीले पक्राउ गरेको छ । उनीहरुको साथबाट लागुऔषध समेत बरामद भएको छ । मकवानपुर, हेटौंडा उपमहानगरपालिका–१५ रातोमाटेबाट अवैध लागूऔषध गाँजा करिब ९ केजी १ सय ५० ग्रामसहित ४ जनालाई बुधबार दिउँसो प्रहरीले पक्राउ गरेको छ ।
पक्राउ पर्नेहरूमा पर्सा वीरगंज महानगरपालिका–९ बस्ने ३१ वर्षीय धनराज गिरी, मकवानपुर राक्सिराङ गाउँपालिका–३ बस्ने ४२ वर्षीय वुद्धिलाल देमदुङ, भारत सितामढी घर भएका २२ वर्षीय दिपक यादव र धनुषा महेन्द्रनगर नगरपालिका–१६ बस्ने १८ वर्षीय किशोर रहेका छन् । प्रहरी चौकी रातोमाटेबाट खटिएको प्रहरीले चितवनबाट वीरगंजतर्फ जाँदै गरेको ना.८ ख ७३४६ नम्बरको बसलाई जाँच गर्ने क्रममा बसमा सवार उनीहरूलाई उक्त गाँजासहित पक्राउ गरेको हो ।
त्यस्तै,महोत्तरीको औरही नगरपालिका–२ फुलबरीयास्थित उखु खेतबाट अवैध लागूऔषध गाँजा करिब ६० केजी बुधबार दिउँसो प्रहरीले बरामद गरेको छ । खेतमा शंकास्पद ३ वटा पोका रहेको भन्ने विशेष सूचनाको आधारमा प्रहरी चौकी औरहीबाट खटिएको प्रहरीले उक्त गाँजा फेला पारी बरामद गरेको हो । गाँजा राख्ने व्यक्तिहरूको प्रहरीले खोजी गरिरहेको छ ।
यस सम्बन्धमा प्रहरीले थप अनुसन्धान गरिरहेको जनाएको छ ।
