काठमाडौं, १ साउन । नेपाल आयल निगमले साउन १ (आजदेखि) लागू हुने गरी इन्धनको स्वचालित मूल्य घोषणा गरेको छ । अब निगमले अन्तर्राष्ट्रिय बजारलाई मध्यनजर गरी डिजेलमा २ र पेट्रोलमा २.५ प्रतिशत नाफा राखेर मूल्य निर्धारण गर्ने भएको हो ।
निगमले खाना पकाउने एलपी ग्याँसमा भने कुनै नाफा नराख्ने जनाएको छ ।
निगमको निर्णयले साउन १ गते काठमाडौं उपत्यकासहित पहाडी जिल्लाहरुमा पेट्रोल प्रति लिटर १६४ रुपैयाँ पर्नेछ । तराईमा १६१ रुपैयाँ ५० पैसा पर्नेछ र भित्री मधेशमा १६३ रुपैयाँ पर्नेछ ।
डिजेल र मट्टीतेल उपत्यका र पहाडी जल्लाहरुमा प्रतिलिटर १४६, तराईमा १४३ रुपैयाँ ५० पैसा र भित्री मधेशमा १४५ रुपैयाँ पर्नेछ । एलपी ग्याँसको मूल्य १७९० रुपैयाँ पर्नेछ ।
निगमले हवाई इन्धनको मूल्य भने स्वचालित नगर्ने निर्णय लिएको छ ।
