काठमाडाैं, २४ पुस । बढ्दो चिसोमा न्यानो कपडाको जोहो गर्न नसक्दा तराईका जिल्लामा २५ जनाको मृत्यु भएको छ । गरिबीका कारण न्यानो कपडाको जोहो गर्न नसक्दा तराईका विभिन्न जिल्लामा चिसोले कठ्याङग्रिएर २५ जनाको मृत्यु भएको हो ।
सप्तरीमा १४, रौतहटमा पाँच, सिरहामा तीन तथा कपिलवस्तु, मोरङ र सुनसरीमा एक-एकजनाको मृत्यु भएको छ । मृत्यु हुनेमा अधिकांश बालबालिका र जेष्ठ नागरिक छन् । चिसोका कारण सुत्केरी महिला प्रभावित भएका छन् ।
राष्ट्रिय मानव अधिकार आयोगले शीतलहर र हिमपातका कारण रौतहट, सिरहा, सप्तरी, कपिलवस्तु, हुम्ला, जाजरकोट लगायत जिल्लामा दुई दर्जनभन्दा बढी व्यक्तिको ज्यान गएको बताएको छ ।
आयोगले न्यून आय भएका समुदायका बालबालिका, जेष्ठ नागरिक र सुत्केरी उच्च जोखिममा रहेको भन्दै न्यानोको व्यवस्था गरी जोखिम न्यूनीकरण गर्न सरकारको ध्यानाकर्षण गराएको छ ।
