काठमाडौं, ७ जेठ । देशमा धर्मनीरपेक्षता कि हिन्दूराष्ट्र भन्ने बहस पेचिलो बन्दै गएको छ । यसमा देशभित्रको मात्र नभई बाह्य शक्ति पनि खुल्न थालेका छन् ।
अमेरिकालगायत पश्चिमा देशहरुको धर्मनीरपेक्षताको पक्षमा ठूलो लगानी खुल्न थालेको छ । धर्मनीरपेक्षता भनेपनि उनीहरु धर्म परिवर्तनका लागि मरिमेटेर लागेको देखिएको छ । यो नेपालमा विभिन्न धर्मालम्बीको पछिल्लो जनसंख्याले झनै देखाउने गरी आउन सक्छ ।
यतिबेला मुख्य राजनीतिक दलहरुभित्रै हिन्दूराष्ट्रको मुद्दा बलियो बन्दै गएको छ । ती दलहरुमा हिन्दूराष्ट्रको मुद्दा उठाउनेहरु खुल्न थालेका छन् ।
हिन्दूराष्ट्र हटाएर धर्मनीरपेक्ष संविधानमा लेख्न मुख्य भूमिका खेलेको नेपाल कम्युनिस्ट पार्टी माओवादी केन्द्रमा समेत यो मुद्दाले प्रवेश पाएको छ । माओवादी नेता रामकुमार शर्मा र इन्दु शर्माले हिन्दूराष्ट्र र धर्मनीरपेक्ष राष्ट्रको विषयमा जनमतसंग्रह गराउन माग गरेका छन् ।
माओवादी अध्यक्ष प्रचण्डलाई भेटेर १८ बुँदे ज्ञापनपत्र बुझाएका उनीहरुले मंगलवार जनमतसंग्रहको विषय उठाएपछि राजनीतिक तरंग आएको छ ।
नेपालको सबैभन्दा ठूलो कम्युनिस्ट दल नेकपा एमालेमा हिन्दूराष्ट्रको पक्षमा केही नेताहरु खुल्न थालेका छन् । अध्यक्ष केपी शर्मा ओली निकट नेता महेश बस्नेतले यो मुद्दा उठाइसकेका छन् । एमालेमा भित्र भित्र हिन्दूराष्ट्रको मुद्दा बलियो बन्दै गइरहेको छ ।
नेपाली काँग्रेसभित्र हिन्दूराष्ट्रको पक्षमा प्रभावशाली नेताहरु नै खुलेका छन् । काँग्रेसका संस्थापक नेता वीपी कोइरालाका छोरा डा. सशांक कोइराला हिन्दूराष्ट्रका पक्षधर छन् । उनी पूर्वमहामन्त्री हुन् । केन्द्रीय सदस्य डा. शेखर कोइराला पनि हिन्दूराष्ट्रका पक्षधर हुन् ।
काँग्रेस केन्द्रीय सदस्य एवं नेपालका परराष्ट्रमन्त्री एन पी साउद पनि हिन्दूराष्ट्रको मुद्दा उठाउने मध्येका हुन् । काँग्रेसभित्र ठूलो संख्यामा नेता कार्यकर्ता हिन्दूराष्ट्रको पक्षधर हुन् ।
हिन्दूराष्ट्रलाई मुख्य मुद्दा बनाउनेमा राष्ट्रिय प्रजातन्त्र पार्टी छ । नेपालको संसदको पाचौं शक्ति राप्रपाले राजावादी दलका रुपमा चिनिन्छ ।
नेपालमा एकातर्फ दलहरुभित्र हिन्दूराष्ट्रको मुद्दा बलियो बन्दै गएको छ अर्कोतर्फ पश्चिमा देशहरु यो घटनाले झस्किएका छन् । उनीहरुले हिन्दूराष्ट्रको मुद्दा बलियो बनाउन भारतीय जनता पार्टीले भूमिका खेलेको आरोप लगाउन थालेका छन् । अमेरिकाले धार्मिक स्वतन्त्रतासम्बन्धी प्रतिवेदनमै भाजपामाथि आरोप लगाएको छ । यसलाई लिएर नेपालमा क्रिया प्रतिक्रिया चलेको छ । हिन्दूराष्ट्रका पक्षधर एकजुट हुँदै गएका छन् । धर्मनीरपेक्षका पक्षधर पनि संगठित हुन थालेका छन् ।
