काठमाडौं । राष्ट्रिय सभा सदस्य वामदेव गौतमले सरकारले उच्च शिक्षा पूर्ण रुपमा निःशुल्क गराउन सक्नुपर्ने बताउनुभएको छ ।
शुक्रवार दिगो विकास तथा सुशासन समितिको बैठकमा बोल्दै उहाँले यस्तो बताउनुभएको हो । उहाँले आफ्नो आवश्यक्ता बमोजिम सरकारले प्राविधिक र गैरप्राविधिक क्षेत्रमा लगानी बिस्तार गरी काम अघि बढाउनुपर्ने बताउनु भयो । उहाँले देशको लागि आवश्यक जनशक्ति यहीँ नै उत्पादन गर्नसके मात्रै शिक्षा क्षेत्रको विकास हुने बताउनु भयो । उहाँले सरकारले स्वदेशमा नै उच्च गुणस्तरीय शिक्षा दिने ग्यारेन्टी गरेर विद्यार्थीहरुलाई विदेश अध्ययनका लागि जान रोक लगाउनुपर्ने बताउनु भयो । उहाँले शैक्षिक शक्ति निर्माण गर्न र विश्वमा प्रतिष्पर्धा गर्नसक्ने जनशक्ति निर्माण गर्ने कुराको ग्यारेन्टी विश्वविद्यालयले लिन सक्नुपर्ने पनि बताउनु भयो ।
उहाँले भन्नुभयो, ‘उच्च शिक्षामा नेपालको सरकारले पूर्ण रुपमा निःशुल्क गराउन सक्नुपर्छ । आफ्नो आवश्यक्ता बमोजिम प्राविधिक र गैरप्राविधिक क्षेत्रमा अघि बढाउनुपर्छ । हाम्रो आवश्यक्ता हो । हामीले त्यो आवश्यक्ताका निम्ति त्यस्ता विज्ञ व्यक्ति तयार गर्नसक्छौँ र बाहिर हामीले पठाएर वैदेशिक मुद्रा आर्जन गर्नसक्ने गरी हामी जानुपर्छ । नपढेका, नजानेका अस्ताक्षर गर्न नसक्ने व्यक्ति जानु भन्दा त यस्ता मानिस जानु हाम्रो निम्ति गौरवको विषय हुन्छ । त्यस्तो शैक्षिक शक्ति कति उत्पादन गर्ने ? कति हाम्रो देशको निम्ति आवश्यक्ता छ ? यो दिशामा नगइकन शिक्षामा विकास हुन सक्दैन । सरकारले ख्याल गर्नुपर्छ की किन विदेश जाने पढ्नको लागि बन्द गर्न सकिँदैन ? र विश्वविद्यालयले भन्न सक्नुपर्छ, हामी उच्च शिक्षाको निम्ति संसारको कुनैपनि ठाउँमा प्रतिष्पर्धा गर्नसक्ने शिक्षा हामी प्रदान गर्नसक्छौँ, हामी तयारी गर्छौं । त्यसको निम्ति कस्तो नीति चाहियो, कस्तो आर्थिक सहायता चाहियो ? यो विषय आउनुपर्छ र सुन्नेले सुन्नुपर्छ ।’
सदस्य गौतमले नेपाललाई चाहिने विज्ञ जनशक्ति कसरी नेपालमा नै उत्पादन गर्ने भन्ने बारेमा राज्य संवेदनशील हुनुपर्ने बताउनु भयो ।
