बग्गीखानाको अनुगमनमा गृहमन्त्री श्रेष्ठ, सवारी साधन कवाडीमा परिणत हुन नदिने दाबी | ईमाउण्टेन समाचार

Our Network

चैत १६ २०८०, शुक्रबार

बग्गीखानाको अनुगमनमा गृहमन्त्री श्रेष्ठ, सवारी साधन कवाडीमा परिणत हुन नदिने दाबी

काठमाडौं । उपप्रधानमन्त्री तथा गृहमन्त्री नारायणकाजी श्रेष्ठले काठमाडौंको रामशाहपथस्थित बग्गीखानाको अनुगमन गर्नु भएको छ ।

नविकरण खारेज भएका र चोरीका सवारी साधनहरु कवाडीमा परिणत भईरहेका बेला उपप्रधानमन्त्री श्रेष्ठले शुक्रबार बिहान काठमाडौं उपत्यका ट्राफिक प्रहरी कार्यालयमा पुगी ती सवारी साधनको अवस्थाबारे जानकारी लिनु भएको हो । प्रहरी महानिरीक्षक बसन्त कुँवरसहित त्यहाँ पुग्नु भएका उहाँलाई त्यस्ता सवारी साधनहरु लिलामी गर्न मिल्ने गरी कानुनी व्यवस्था गरिदिन काठमाडौं उपत्यका ट्राफिक प्रहरी कार्यालयको प्रमुख प्रहरी नायव महानिरीक्षक षोषराज पोखरेलले आग्रह गर्नु भएको थियो ।

जवाफमा उपप्रधानमन्त्री श्रेष्ठले त्यस्ता सवारी साधनहरुलाई कवाडीको रुपमा राख्न नमिल्ने उल्लेख गर्दै ती समस्या समाधान हुने गरी छिट्टै कानुनी व्यवस्था गर्ने आश्वासन दिनु भएको थियो । उहाँले त्यसका लागि समस्या र समाधानका उपायहरुसहितको बूँदा मन्त्रालयमा बुझाउन पनि सो कार्यालयलाई निर्देशन दिनु भएको थियो । उपप्रधानमन्त्री श्रेष्ठले भन्नु भयो, ‘यो तपाईहरुले बूँदा बनाउनुहोस् समस्याहरुको । र, यसको समाधान गर्ने कामहरु के–के हुन ? बूँदा बनाउनुहोस् । अनि, छानविन गरी छिट्टै समाधान गर्नुपर्छ । यही रुपमा राख्न मिल्दैन ।’

यता, सो ट्राफिक कार्यालयका प्रमुख प्रहरी नायव महानिरीक्षक पोखरेलले भने आफूहरुले लिलामी गर्न मिल्ने कानुन नभएको त्यस्ता सवारी साधनहरु वर्षौसम्म होल्ड गरेर राख्नुपर्ने अवस्था आएको उपप्रधानमन्त्री श्रेष्ठलाई व्रिफिङ गर्नु भएको थियो । उहाँले त्यसका लागि विशेष कानुनको व्यवस्था गर्न ढिलाई गर्न नहुने पनि बताउनु भयो ।

Leave a Reply

(function ($) { $(function () { $('#announcementModal').modal('show'); }) })(jQuery);