काठमाडौं, १४ वैशाख । जनक शिक्षा सामाग्री केन्द्र लिमिटेडले नयाँ शैक्षिक सत्रका लागि सबै जिल्लामा पाठ्यपुस्तक पुर्याएको छ । ७७ जिल्लामा पाठ्यपुस्तक पुगेपनि वितरणको काम भइरहेकाले केही विद्यालयमा सहजरुपमा पुग्न अझै केही समय लाग्ने भएको छ ।
केन्द्रका महाप्रबन्धक अनिल झाले करिब ९० प्रतिशत पाठ्यपुस्तक वितरण भइसकेको जानकारी दिए । कक्षा ६ देखि १२ कक्षा सम्मका लागि १ करोड ५० लाख थान पुस्तक छाप्ने जिम्मेवारी केन्द्रले पाएको थियो । झाको अनुसार बुधबारसम्म १ करोड ३३ लाख ९५ हजार ७ सय थान पाठ्यपुस्तक वितरण भइसकेको छ । कक्षा १ देखि ५ कक्षासम्म पाठ्यपुस्तक छपाइको जिम्मेवारी पाएको नीजि मुद्रण संस्थाले पनि सम्पुर्ण पुस्तक छापेर वितरण गरिसकेको छ ।
सधै नकारात्मक चर्चा भइरहँदा सकारात्मक चर्चा चलेको छ– विद्यालयका बालबालिकाले शैक्षिक सत्र सुरु नहुँदै पाठ्यपुस्तक पाएको । सायदै नेपालको इतिहासमा कहिले नघटेको घटना जस्तै छ अहिले । दुर्गम जिल्लाहरुमा पनि पाठ्यपुस्तक पुगेका छन् यसपाली ।
विगतका वर्षहरुमा शैक्षिक वर्ष आधा आधी हुँदा पनि विद्यार्थीले पाठ्यपुस्तक पाएनन् । दुर्गम जिल्लाको पीडा त छँदै थियो । काठमाडौं उपत्यकामा पनि पाठ्यपुस्तकबाट वञ्चित भए विद्यार्थी । यसपटक भने सबैको हातहातमा पुस्तक पुगिसकेको छ । यसमा जनक शिक्षा सामाग्री केन्द्रका महाप्रबन्धकको अहोरात्र खटाई र कुशल नेतृत्वले भूमिका खेलेको छ ।
इञ्जिनियर झासँग जनक शिक्षामा काम गरेको पुरानो अनुभव छ । उनले विगतमा काम गर्दा पनि जनक शिक्षालाई नाफामा लगेर किर्तिमान बनाएका थिए । नयाँ र अत्याधुनिक मेशिन जडान गरेका थिए । यसपटक झाले पाठ्यपुस्तक समयमै विद्यार्थीको हातमा पुर्याउन रातदिन खटिए । झाले उदयपुर सिमेन्ट कारखानामा पनि महाप्रबन्धकको जिम्मेवारी सम्हालिसकेका छन् । उनले उक्त कारखानालाई निकै सुधारेर कुशलता देखाइसकेका छन् ।
समयमै पाठ्यपुस्तक विद्यार्थीको हातमा पुर्याउने गरी कार्य गरेवापत् उनी यतिबेला चर्चामा छन् । झाको कामबाट प्रधानमन्त्री प्रचण्ड पनि खुशी भएको बुझिएको छ । कुनैपनि काम देखाउन नसकेका प्रचण्डका लागि अहिले विद्यार्थीको हातहातमा पुस्तक पुगेको देखाउने र सुनाउने विषय बन्न पुगेको छ ।
