काठमाडौं, ३ वैशाख । राष्ट्रपति रामचन्द्र पौडेलको पहिलो विदेश भ्रमण बेलायत हुने भएको छ । उनी वैशाखको तेस्रो हप्तामा बेलायत भ्रमणमा जाने बुझिएको छ ।
राष्ट्रपति निकट स्रोतका अनुसार बेलायतका राजा चाल्र्स तृतीयको राज्याभिषेकमा सहभागी हुन पौडेल बेलायत जाने तयारी भएको छ । भ्रमणबारे बेलायतका लागि राजदूत ज्ञानचन्द्र आचार्यले जानकारी गराइसकेको बुझिएको छ ।
राष्ट्रपति पौडेल बेलायत जाने गरी परराष्ट्र मन्त्रालयले तयारी बढाइसकेको छ । चाल्र्सको राज्याभिषेक मे ६ मा हुने तय छ ।
फागुनमा राष्ट्रपति निर्वाचित भएपछि पौडेल विदेश भ्रमणमा गएका छैनन् । बेलायत गएमा उनको पहिलो विदेश भ्रमण हुनेछ ।
नेपाल र बेलायतबीच भारतमा उसको उपनिवेश छँदै कूटनीतिक सम्बन्ध रहँदै आएको छ । नेपालका गोर्खा सैनिक बेलायती सेनामा कार्यरत छन् ।
