काठमाडौं । संसदका दुई ठूला दलहरु नेपाली काँग्रेस र नेकपा (एमाले) ले प्रमुख प्रतिपक्षी दल आफू दाबी गरेका छन् ।
प्रधानमन्त्री पुष्पकमल दाहाललाई संसदको पहिलो दल नेपाली काँग्रेस र दोस्रो दल नेकपा (एमाले) ले विश्वासको मत दिएका थिए । सरकारलाई विश्वासको मत दिएपनि आफू सरकारमा सहभागि नभएको भन्दै नेपाली काँग्रेस प्रतिपक्षी बेन्चमा बस्दै आएको थियो । राष्ट्रपतिको उम्मेदवारको विषयमा तत्कालिन सत्तारुढ गठबन्धन विभाजित भएपछि गत सोमवार नेकपा(एमाले)ले सरकार छोडेको थियो भने सरकारलाई दिएको समर्थन पनि फिर्ता लिएको थियो । यससँगै नेकपा(एमाले)ले आफूहरु प्रमुख प्रतिपक्ष भएको दाबी गरेको छ । कुन–कुन दल सत्तापक्ष र कुन–कुन दल प्रतिपक्ष हुन् भन्ने यकिन नभइसकेको अवस्थामा बुधवारका लागि तय भएको प्रतिनिधि सभाको बैठक आगामी चैत्र ५ गतेसम्मका लागि स्थगित भएको छ ।
काँग्रेस र एमाले भने आफूलाई प्रमुख प्रतिपक्षी भएको तर्क पेस गरिरहेका छन् । यसै सन्दर्भमा नेपाली काँग्रेसका प्रमुख सचेतक रमेश लेखकले नेपाली काँग्रेस पार्टी प्रमुख प्रतिपक्षी दल भएको बताउनु भयो । उहाँले प्रमुख प्रतिपक्ष दलको नेता शेरबहादुर देउवा रहेको पनि उल्लेख गर्नुभयो । काँग्रेस सरकारमा नजाँदासम्म संसदको प्रमुख प्रतिपक्षी दलको हैसियतमा रहने उहाँको भनाई छ । एमाले पनि सरकारमा नरहेको अवस्था भएमा संख्यात्मक हिसावले काँग्रेस अगाडी रहेकाले काँग्रेस नै प्रमुख प्रतिपक्षी दल हुने उहाँले बताउनु भयो ।
त्यस्तै नेकपा (एमाले) का सचिव तथा सांसद छविलाल विश्वकर्माले एमाले सरकारमा नरहेको र समर्थन पनि नगरेकाले प्रमुख प्रतिपक्षी भएको बताउनु भयो । उहाँले आफूहरुले औपचारिक रुपमै प्रमुख प्रतिपक्षी भएको दाबी गरिसकेको स्पष्ट पार्नुभयो । यद्यपी को प्रमुख प्रतिपक्षी दल हो भन्ने कुरा निरुपण गर्ने काम संसद सचिवालयको भएको उहाँले बताउनु भयो ।
त्यसैगरी एमालेका केन्द्रिय सदस्य सांसद ठाकुर गैरेले एमाले संसदको प्रतिपक्षी बेन्चमा बस्ने बताउनु भयो । एमाले प्रतिपक्षी भएर जनताको आवाज संसद र सडकबाट उठाउने उहाँले बताउनु भयो ।
उहाँले एमाले सरकारमा रहँदापनि कांग्रेसले सरकारलाई विश्वासको मत दिएको उल्लेख गर्दै काँग्रेस सत्तापक्ष अथाव प्रतिपक्ष दुवै हैसियतमा बस्न नसकेको टिप्पणी गर्नुभयो । उहाँले काँग्रेसको परिचय खुल्न नसकेको प्रतिक्रिया दिनुभयो ।
