एजेन्सी । टर्की र सिरिया (टर्की भुकम्प)का जनता सोमबार बिहान निद्राबाट उठेका पनि थिएनन् तर उनीहरुलाई प्राकृतिक प्रकोपले घेरिसकेको थियो । दुवै देश ७.८ रेक्टर स्केलको भूकम्पले हल्लाएको थियो । यति मात्र होइन, केही घण्टाभित्रै थप ७.६ र ६.० रेक्टर स्केलको भूकम्प पनि गएको छ । यस प्रकोपमा ४ हजारभन्दा बढीको मृत्यु भएको छ भने १० हजारभन्दा बढी घाइते भएका छन् । टर्कीमा २ हजार ३ सय १६ र सिरियामा १ हजार ९ सय ९९ जनाको ज्यान गएको छ । भूकम्पका कारण सयौं भवन भत्किएका छन् । मानिसहरू भाग्नका लागि हिउँको बाटोमा भेला भए।
सबैभन्दा धेरै विनाश दक्षिणी टर्की र उत्तरी सिरियामा भएको थियो। राहत र उद्धार कार्य जारी छ। उद्दारकर्ताहरूले भग्नावशेषमा फसेका मानिसको खोजी कार्य जारी राखेकाले मृतकको संख्या बढ्न सक्ने अनुमान गरिएको छ । धेरै मानिस अझै पनि भग्नावशेषमुनि दबिएका छन् । यहाँ यो पनि उल्लेख गर्नुपर्दछ कि यसअघि सन् १९३९ मा टर्कीमा ७.८ म्याग्निच्युडको भूकम्प गएको थियो जसमा ३२ हजारभन्दा बढीको ज्यान गएको थियो ।
बिहानको भूकम्पको मुख्य केन्द्रविन्दु टर्कीको गाजियन्टेप प्रान्तको नुरदागीबाट २३ किलोमिटर पूर्वमा रहेको थियो । यस भयानक प्राकृतिक प्रकोपपछि टर्कीमा ७ दिने राष्ट्रिय शोकको घोषणा गरिएको छ । टर्कीको अनादोलु समाचार एजेन्सीले राष्ट्रपति रेसेप तैयप एर्दोगानलाई उद्धृत गर्दै टर्की र विदेशी प्रतिनिधित्वमा फेब्रुअरी १२ मा सूर्यास्त नभएसम्म देशको झण्डा आधा झुकाउने बताएको छ।
करिब एक मिनेटसम्म भूकम्पको धक्का महसुस गरिएको थियो । भूकम्पको केन्द्रविन्दुबाट साढे पाँच हजार किलोमिटर टाढा रहेको ग्रिनल्याण्डसम्म भूकम्पको धक्का महशुस गरिएको तथ्यबाटै स्थितिको भयावहता अनुमान गर्न सकिन्छ । लेबनानका मानिसहरूले करिब ४० सेकेन्डसम्म भूकम्पको धक्का महसुस गरेका थिए भने राजधानी बेरुतमा मानिसहरू घरबाट बाहिर निस्केका थिए।
यसैबीच, टर्कीमा भएको विनाशका धेरै भिडियोहरू इन्टरनेट मिडियामा प्रसारित भइरहेका छन्। यसमा अग्ला भवनहरु भुइँमा परेको देखाइएको छ । मानिसहरु आफ्ना प्रियजनलाई यताउता खोजीरहेका देखिन्छन् । सडकबाट गुज्रिरहेका धेरै मानिसले भिडियोमार्फत विनाशको दृश्य देखाउँदै आएका छन् ।
नेदरल्याण्डका एक अनुसन्धानकर्ता फ्रान्क हुगरबिट्सले फेब्रुअरी ३ मा ट्वीट गर्दै सो क्षेत्रमा ७.५ म्याग्निच्युडभन्दा बढीको भूकम्प आउने भविष्यवाणी गरेका थिए। उनको भविष्यवाणी तीन दिन पछि सही साबित भयो। टर्कीमा सोमबार ७८ भन्दा बढी भूकम्प गएका छन् ।
टर्की भूकम्पका लागि सबैभन्दा खतरनाक ठाउँ मानिन्छ। टेक्टोनिक प्लेटहरू यहाँ बारम्बार भूकम्पको कारण हुन्। आठ करोड जनसंख्या भएको यो देश चार टेक्टोनिक प्लेटमा अवस्थित छ । यी प्लेटहरू मध्ये एक सर्ने बित्तिकै, सम्पूर्ण क्षेत्रमा शक्तिशाली कम्पनहरू छन्।
