काठमाडौं प्रवेश गर्ने लाइफलाइनका रुपमा लिइने मुग्लिन–नारायणगढ सडकखण्डमा यही पुस १८ गतेदेखि रातिको समय यातायात बन्द गरिने भएको छ ।
सडक विस्तारको काम भइरहेको उक्त सडक खण्डमा भित्तो काट्ने काम बाँकी रहेकाले राति १० बजेदेखि बिहान ४ बजेसम्म सवारी आवागमन रोकिने भएको हो । सरोकारवालाहरुको बैठकले सडक विस्तारको काममा सन्तोषजनक प्रगति नभएपछि कामलाई तीव्रता दिन रातिको समयमा सवारीसाधनको आवागमन बन्द गर्ने निर्णय गरेको हो । जिल्ला प्रशासन कार्यालय भरतपुरमा भएको बैठकले दिउँसोको समयमा पनि एकतर्फी मात्र सवारीसाधन सञ्चालन गर्ने निर्णय गरेको छ । बैठकले रातिको समयमा भित्तो काट्ने, सम्याउने लगायत काम गर्ने र दिउँसोको समयमा कालोपत्र गर्नेे काम अगाडि बढाउने निर्णय गरेको छ । उक्त सडकखण्डको १६ किलो र २२ किलोमा ५ सय मिटर तथा ३३ किलोमा ३ सय मिटर भित्तो काट्ने काम अझै बाँकी छ । ३६ किलोमिटर सडकमा अहिलेसम्म १३ दशमलव ५ किलोमिटर सडक एक तह मात्र कालोपत्र गरिएको छ । बैठकमा ठेकेदार कम्पनीका प्रतिनिधिले भने रातिको समय काम गर्ने जनशक्ति अभाव हुने भन्दै दिउँसो आठ घण्टा सवारी आवागमन बन्द गर्न माग गरेका थिए ।
