उदयपुर, १६ मंसिर । एमालेका अध्यक्ष केपी शर्मा ओलीले बम पड्काएर नागरिकलाई आतंकित पार्न खोज्दैमा मंसिर २१ गते हुन गइरहेको प्रतिनिधिसभा र प्रदेशसभाको निर्वाचन कुनै पनि हालतमा नरोकिने बताएका छन् ।
गाईघाटको थारुहट रंगशालामा आज वाम गठबन्धनले आयोजना गरेको चुनावीसभालाई सम्बोधन गर्दै अध्यक्ष ओलीले यस्तो बताएका हुन् । अहिले देशमा चुनाव भाँड्ने नाममा बम पड्किरहेको छ ।
बम पड्काउनेहरुले आफैँले नभई कसैको इसारामा बम पड्काउने काम गरेकाले बम पड्कँदैमा चुनाव रोकिन्न । तीन करोड नेपाली जनताले चाहेको चुनाव दुई/चारवटा बम पड्कदैमा रोकिन्न ।
निर्दोष जनता र उम्मेदवारलाई लक्षित गरी बम नहान्न ओलीले आग्रह गरे । तीन करोड नेपालीको चाहना निर्वाचन भएकाले भय रहित तरिकाले निर्वाचन हुनुपर्नेमा उनले जोड दिए ।
निर्वाचनमार्फत नयाँ सरकार गठन गरेर देशलाई नयाँ बाटोमा लाने कार्यसँग कसैले पनि खेलबाड नगर्न ओलीले चेतावनी दिए। सोही सभामा बोल्दै अध्यक्ष ओलीले चुनाव लगत्तै एमाले र माओवादीबीच पार्टी एकता हुने बताए ।