मेलापातमा पुगेर मतदाता रिझाउँदै उम्मेदवार | ईमाउण्टेन समाचार

Our Network

असोज १७ २०७९, सोमबार

मेलापातमा पुगेर मतदाता रिझाउँदै उम्मेदवार

खोटाङ । आगामी ३० वैशाखमा हुने स्थानीय तहको निर्वाचनका लागि खोटाङका उम्मेदवारहरू मतदातालाई मेलापातमै भेटेर भोट मागिरहेका छन् । भोट माग्नका लागि घरदैलोमा निस्किएका उम्मेदवार, पार्टीका नेता तथा कार्यकर्ताले घरमा नभेटिएका मतदातालाई मेलापातमै पुगेर भेट गर्दै मत दिनका लागि रिझाइरहेका छन् ।

निर्वाचन परिणाम आफ्नो पक्षमा पार्नका लागि कांग्रेस, एमाले, माओवादी केन्द्र, जसपा, नेकपा एकीकृत समाजवादी, राप्रपालगायतका दलका उम्मेदवार घरदैलोमा व्यस्त छन् ।

उम्मेदवार तथा नेता कार्यकर्ताको टोली मतदातालाई बारी खनजोत गरिरहेको, मकै र आलुको बिरुवा गोडमेल गरिरहेको, गहुँ काटिरहेको, मल ओसारिरहेको, गोठालो गरिरहेको, घर निर्माण गरिरहेको, धानको ब्याड राख्दै गरेको अवस्थामा भेटेर भोट दिन आव्हान गरिरहेका छन् । निर्वाचनको मिति नजिकिएकै गतिमा दलको चुनावी घरदैलो घनिभूत बन्दै गएको देखिन्छ ।

१० स्थानीय तह रहेको जिल्लामा सबै किसिमको हावापानी छ । अधिकांश मतदाता खेतीपातीमा निर्भर छन् । भूगोल अनुसार मतदाता खेतीकिसानीको काममा व्यस्त रहन्छन् । यो सिजनमा बेँसीका किसानलाई मकै छर्ने, गोड्ने, गहुँ भित्र्याउने लगायतका काम गर्न भ्याइनभ्याइ छ । लेकका मतदाता आलु गोड्ने र मकै गोड्ने काममा व्यस्त छन् ।

अधिकांश मतदातालाई बिहान र बेलुका मात्र घरमा भेटिन्छ । घरमा भेटिने मतदातालाई घरैमा र घरमा नभेटिएका मतदातालाई मेलापातमै भेटेर भोट माग्ने गरिएको दिक्तेल रुपाकोट मझुवागढी नगरपालिका–५ लफ्याङका नेकपा एकीकृत समाजवादीका वडाध्यक्षका उम्मेदवार राजेन्द्र राई बताउँछन् ।

कतिपय उम्मेदवारले घरमा नभेटिएका मतदातालाई नजिकै छन् भने घर आउनका लागि बोलाउने गरेका छन् भने कतिपय भने काम गरिरहेकै ठाउँमा पुगेर भोट माग्ने गरेका छन् । मेलापातमा पनि नभेटिएका मतदाताको घरमा भने खबरसहित क्यालेण्डर, चुनाव चिन्ह, नमुना मतपत्र छोडिदिने गरिएको दिप्रुङ चुईचुम्मा गाउँपालिका–२ डाँडागाउँमा जसपाबाट वडासदस्यका उम्मेदवार टंक थापाले बताए । कतिपय मतदातालाई बिहे, पास्नी र देवालीमा भेटिने गरेको उम्मेदवारहरूको भनाई छ ।

दिप्रुङ चुईचुम्मा गाउँपालिका–४ बतासेमा कांग्रेसबाट वडाध्यक्षमा उठेका राजदेश राईले धेरैजसो मतदातालाई मकै छरिरहेको, मल ओसारिरहेको, गोलमेल गर्दै गरेको अवस्थामा भेटिएको बताउँछन् । रावाबेँसी गाउँपालिका–३ लामीडाँडामा एमालेबाट वडाध्यक्षमा लडिरहेका वीरेन्द्र मगरका अनुसार मतदातालाई बारीमा मकै छर्दै गरेको र गोठालोमा भेटिने गरेको छ ।

चुनावी घरदैलोका क्रममा कतिपय मतदातालाई मकै गोडमेल गरिरहेको, धानको ब्याड राखिरहेको र गोठालो गरिरहेको अवस्थामा भेटिएको दिक्तेल रुपाकोट मझुवागढी नगरपालिका–३ बाम्राङका नेकपा माओवादी केन्द्रका वडाध्यक्षका उम्मेदवार जमानसेर राई (युगसन किरात)ले बताए ।

Leave a Reply