तेह्रथुम । हातमा सीप नहुँदा गाउँमा सामान्य रोजगारबाहेक अरु कुनै विकल्प नभएपछि वैदेशिक रोजगारमा जाने नेपाली युवाहरूको बाध्यता नै हो । तेह्रथुममा पनि यस्तै देखिँदै आएको छ । आफूसँग कुनै सीप नभएकै कारण भौतारिरहेका युवाहरूलाई विभिन्न संस्थाहरूले सीपमुखी तालिम दिएपछि रोजगार बन्न थालेका छन् ।
खाली समय क्यारामबोर्ड, लुडो खेलेर समय बिताउँदै आएका युवाहरू यतिबेला कुनै न कुनै काममा व्यस्त देखिन थालेका छन् । आर्थिक रूपले कमजोर विपन्न महिला तथा पुरुषहरूलाई सीप विकास तालिम प्रदान गरी स्वरोजगार बनाउने उद्देश्यले ग्रामीण उद्यम तथा विप्रेषण आयोजना (समृद्धि) र हेल्भेटासले सञ्चालन गरेको तालिममा करिब तीन सय युवा दक्ष बनेका छन् ।
गरिबीको कारण बढ्दै बेरोजगार युवाहरूलाई उपयुक्त सीपयुक्त बनाई आत्मनिर्भर र स्वरोजगारको सिर्जना गरी निरपेक्ष गरिबीको रेखामुनि रहेकाको जीवनस्तर उठाउने अभिप्रायले तेह्रथुमको विभिन्न पालिकामा सञ्चालन गरिएको तालिमबाट करिब तीन सय युवाले सीप सिकेका हुन् । सीप सिकेपछि यतिबेला उनीहरू आ–आफ्नो सीपलाई व्यवहारमा लागू गर्न थालेका छन् ।
गाउँमा कुनै रोजगारीको अवसर सिर्जना गरी समतामूलक तथा समावेशी आर्थिक गरिबी न्यूनीकरण विकास गर्ने लक्ष्यका साथ बिभिन्न तालिम प्रदायक कम्पनीले तेह्रथुमका युवालाई सीपमुलक तालिम प्रदान गरेका हुन् । तालिम पाएपछि बनेपछि आफूसँगै युवाहरूलाई पनि रोजगार बनाउने अम्बिका विश्वकर्माको भनाइ छ ।
नेपाल सरकार र कृषि विकासका लागि अन्तर्राष्ट्रिय कोषबीच सन् २०१५ डिसेम्बरमा सम्झौता भई उद्योग, वाणिज्य तथा आपूर्ति मन्त्रालयअन्तर्गत ग्रामीण उद्यम तथा विप्रेषण आयोजना (समृद्धि) कार्यान्वयनमा आएसँगै युवाहरूले सीपमूलक तालिम लिन पाएका हुन ।
युवाहरूले मेसन, कार्पेन्टर, ब्युटिसियन, सिलाई कटाई, कुक, वेटर, पलम्बिङलगायतका सिप सिकाएको प्रशिक्षक दिपेन प्रधानले बताए । लघु,घरेलु तथा साना उद्यम प्रवद्र्धन गर्ने तथा ग्रामीण गरिब घरपरिवारका लागि दिगो आयआर्जनको स्रोत तयार गर्न यो तालिमले महत्वपूर्ण भूमिका निर्वाह गर्ने भएको छ ।
तालिम पाएका युवाहरू कृषि तथा गैरकृषि क्षेत्रमा ग्रामीणस्तरका आयआर्जनमा सहयोग पुग्ने हेल्भेटास नेपाल प्रदेश नम्बर १ का संयोजक सुकबहादुर चौधरीको भनाइ छ ।
