काठमाडाैं । प्रमुख प्रतिपक्षी दल नेकपा(एमाले)ले अफगानिस्तानमा रहेका नेपाली नागरिकलाई तुरुन्त स्वदेश फिर्ता गराउन सरकारसमक्ष माग गरेको छ । प्रतिनिधि सभाको सोमवारको बैठकमा शुन्य समय अघि नै बोल्दै प्रमुख प्रतिपक्षी दल नेकपा(एमाले)का सांसद गोकुल प्रसाद बाँस्कोटाले द्धन्दग्रस्त मुलुक अफगानिस्तानमा भइरहेका राजनीतिक संघर्षका कारण अलपत्र परेका नेपालीहरुलाई तत्काल स्वदेश फर्काउन माग गरेको हो ।
वर्तमान सरकारले अफगानिस्तानमा संकटमा परेका नेपालीलाई आफ्नो देश छ र देशमा सरकार छ भन्नेकुराको अनुभुति गराउन नसकेको पनि उनले बताए । सरकारको नेपालीलाई फर्काइनेछ भन्ने प्रतिवद्धताले नपुग्ने भन्दै उनले त्यहाँ रहेका नागरिक सुरक्षित छन् र सुरक्षित फर्काइने छ भन्ने प्रतिवद्धतासँगै कार्यान्वयन पनि हुनुपर्ने बताए । उनले भने ‘त्यहाँ संकटमा परेका नेपालीहरुले आफ्नो देश छ । आफ्नो देशमा सरकार छ । र त्यहाँबाट हाम्रो सुरक्षाको निम्ति पहलकदमी हुन्छ भन्नेकुरा थाहा पाएनन् । हामी यस प्रकारको गैर जिम्मेवार र अनुत्तरदायी सरकार यो होला भनेर कल्पना गरिरहेका थिएनौँ । त्यहाँ रहेका नागरिकहरुको रक्षा हुनुपर्दछ । तिनको फिर्तीको व्यवस्था मिलाइनु पर्दछ । र त्यो फेरी कुनै प्रतिवद्धताले पुग्दैन । सरकारले यस विषयमा संसदलाई जानकारी गराउनुपर्दछ । त्यहाँ रहेका नागरिक सुरक्षित छन् र सुरक्षित फर्काइने छ भन्ने प्रतिवद्धता व्यक्त गर्नुपर्दछ । प्रतिवद्धता सँगैँ एक्शन गर्नुपर्दछ ।’
सांसद बाँस्कोटाले नेपाल सार्क मुलुकको अध्यक्ष भएको नाताले अफगानिस्तानको घटनाप्रति सरकारको दृष्टिकोण सार्वजनिक गर्नुपर्ने बताए । उनले अफगानिस्तानको राजनीतिक घटनाको सम्बन्धमा सरकारले आफ्नो दृष्टिकोण सदनमा स्पष्ट पार्न पनि माग गरे । उनले भने ‘अफगानिस्तानको घटना के हो ? क्रान्ति हो ? प्रतिक्रान्ति हो ? हिंसा हो ? आक्रमण हो ? प्रत्याक्रमण हो ? हस्तक्षेप र प्रतिहस्तक्षेपका अनन्त श्रृङ्खलाहरुले थिलथिलो र खलबल्लिइरहेका त्यहाँको जनताको सुख, समृद्धि लोकतन्त्र आदी माथिको समस्या हो ? के हाम्रो देशको कुनै राष्ट्रिय, अन्तर्राष्ट्रिय र हाम्रो परराष्ट्रको कुनै दृष्टिकोण छैन ? हामी यो जान्न चाहान्छौँ सरकारले यस विषयमा सदनलाई स्पष्ट पार्नको निम्ति रुलिङ होस् भनेर माग गर्न चाहान्छौँ ।’
उनले अफगानिस्तानको घटनाबाट वैदेशिक हस्तक्षेपहरु कुनैपनि स्वाधिन राष्ट्रको लागि कामयावी हुँदैनन् र अर्थहिन हुन्छन् भन्नेकुरा सिक्नुपर्ने बताए । कुनैपनि देशमा बलियो राष्ट्रवादी शक्ति, दलहरु वा राष्ट्रिय शक्तिको निर्माण हुनुपर्दछ भन्ने देखिएको पनि उहाँले उल्लेख गरे ।
