पर्सा । पर्सा जिल्लामा केही दिन देखि कोरोना सङ्क्रमित तथा मृत्यु दर लगातार घट्ने क्रम जारि गरेको देखिन्छ । बिहिबार यहाँ स्थित नारायणी अस्पतालमा गरिएको परिक्षणमा पर्साका जम्मा ३७ जनामा कोरोना सङ्क्रमण पुष्टि भएको छ ।
अस्पतालका कोभिड संयोजक डा. सरोज रोशन दास अनुसार अस्पतालको प्रयोशालमा विभिन्न स्थानबाट सङ्कलन गरेर ल्याइएको २ सय ८८ जनाको स्वाबलाई पिसिआर प्रविधिबाट परिक्षण गर्दा पर्साका ३७ सहित जम्मा ५४ जनामा सङ्क्रमण भेटिएको हो । सङ्क्रमित हुने १४ जना महिला पनि छन् ।
पछिल्लो दिनहरुको तुलनामा नारायणी अस्पतालमा सङ्क्रमण पुष्टि हुने दर घटेर १८.७५ प्रतिसतमा झरेको हो । बुधबार सङ्क्रमण पुष्टि हुने दर २८.४७ प्रतिसत थियो भने मंगलबार २६.७४ प्रतिसत थियो । बैशाखमा सङ्क्रमण उत्कर्षमा पुगेको बेला नारायणीमा भएको स्वाब परिक्षणमध्ये का ७० प्रतिसतसम्ममा सङ्क्रमण पुष्टि हुनेगरेको थियो ।
नारायणी अस्पतालमा सङ्क्रमण पुष्टि हुने अन्यमा बाराका १३ जना र रौतहट र सर्लाहीका २/२ जना रहेको डा. दासले जानकारी दिए ।डा. दास अनुसार थपिएका सङ्क्रमितहरु १४ वर्षदेखि ७५ वर्ष उमेर समूहसम्मका रहेका छन् भने उनीहरुको सिटि भ्यालु १६.९ देखि ३५.८ सम्म रहेको छ ।
