काठमाडौं । जनता समाजवादी पार्टी जसपाका अध्यक्ष महन्थ ठाकुर र राजेन्द्र महतो पक्षका सांसदहरु बिहीबार भक्तपुरको एक रिसोर्टमा भेला भएका छन् ।
कांग्रेसको नेतृत्वमा माओवादी केन्द्रको गठबन्धलाई साथ नदिने अडान लिँदै आएका जसपाका ठाकुर महतो पक्षका सांसदहरु रिसोर्टमा भेला भएका हुन् ।
गएको सोमबार प्रधानमन्त्री केपी शर्मा ओलीले सदनबाट विश्वासको मत लिन असफल भएपछि राष्ट्रपति विद्यादेवी भण्डारीले धारा ७६ (२) अनुसार बहुमतको सरकार बनाउनका लागि दिएको समय सीमा आज बेलुकी ९ बजे सकिँदैछ ।
सोही समयसीमा भित्र कांग्रेस नेतृत्वको सरकार निर्माणमा सहभागी हुन नदिन ठाकुर र महतोले आफू पक्ष १६ सांसदहरुलाई रिसोर्टमा लगिएको बुझिएको छ ।
रिसोर्टमा पुगेका सांसदहरुले भने आफूहरु छलफलका लागि पुगेको बताएका छन् ।
जसपाका ठाकुर महतो पक्षको समर्थनविना देउवाले बहुमतको सरकार निर्माण गर्न नसकिने देखिएको छ । यद्यपी नेकपा एमालेका नेपाल पक्षका सांसदहरुले राजीनामा दिएमा भने देउवाले बहुमत पाउन सक्नेछन् ।
नयाँ सरकार निर्माणका लागि एक सय ३६ आवश्यक पर्दछ । हाल प्रतिनिधिसभामा जम्मा दुई सय ७१ सांसद छन् जसमध्ये कांग्रेससँग ६१, माओवादी केन्द्रसँग ४८ र जसपासँग ३२ सांसद छन् । जसपाका ३२ सांसदमध्ये ठाकुर महतो पक्षका सांसद तटस्थ बस्ने बताएका छन् ।
नेकपा एमालेसँग भने एक सय २१ सांसद छन् । यदि जसपाका ठाकुर पक्षका सांसदहरुको साथ नपाउने हो भने र एमालेका नेपाल पक्षका सांसदहरुले राजीनामा नदिने हो भने संसदको ठूलो दलको संसदीय दलको नेताका हैसियतले केपी शर्मा ओली नै पुनः प्रधानमन्त्री बन्ने छन् ।
