काठमाडौं, १ चैत। जल तथा मौसम पूर्वानुमान महाशाखाले आइतबार देशको पहाडी भूभागहरुमा मौसममा आंशिकदेखि सामान्य बदली रहे पनि बाँकी भूभागहरुको मौसम सामान्यतया सफा रहने जनाएको छ ।
महाशाखाका अनुसार आइतबार बागमती प्रदेश र प्रदेश नम्बर १ का पहाडी भूभागका केही स्थानमा मेघ गर्जन र चट्टयाङसहित हल्का वर्षाको सम्भावना रहेको छ । राति पनि देशको पहाडी भूभागहरुमा आंशिक बदली रही बाँकी भूभागहरुको मौसम सामान्यतया सफा रहने छ।
साथै गण्डकी प्रदेश र प्रदेश नम्बर १ का पहाडी भूभागका केही स्थानमा मेघ गर्जन र चट्टयाङसहित हल्का वर्षाको सम्भावना रहेको छ।
हाल नेपालमा स्थानीय वायुसँगै पश्चिमी वायुको समेत प्रभाव रहेको छ।
साँझपख प्रदेश १, बागमती प्रदेश र गण्डकी प्रदेशका पहाडी भूभागका थोरै स्थानहरुमा मेघ गर्जन, चट्टयाङ् र हावाहुरीसहित हल्का वर्षाको सम्भावना रहेकोले आवश्यक सतर्कता अपनाउन मौसमविद्को आग्रह रहेको छ।
शनिबार भने काठमाडौं लगायत देशका पहाडी भूभागहरुमा केही बर्षा भएको थियो ।
