धनगढी, २१ कार्तिक । कोरोना संक्रमणका कारण कैलालीको गौरीगंगा नगरपालिकाका वडा नम्बर ३ का वडा अध्यक्ष तथा नगरपालिकाका प्रवक्ता नरेन्द्रबहादुर शाहको मृत्यु भएको छ । गौरीगंगा नगरपालिकाका मेयर भिमबहादुर देउवाका अनुसार ६३ वर्षीय शाहको शुक्रबार बिहान ६ः २५ बजे मृत्यु भएको हो ।
शाह १० दिनदेखि सेती प्रादेशिक अस्पतालको कोरोना अस्पतालमा उपचाररत हुनुहुन्थ्यो । उहाँको भेन्टिलेटरमा राखेर उपचार भइरहेको थियो ।कडा खालको निमोनिया देखिएपछि कार्तिक १२ गते अस्पताल भर्ना भएका शाहलाई १७ गते कोरोना पुष्टि भएको थियो ।
संक्रमण पुष्टि भएपछि ७३ वर्षीय शाहलाई कोरोना अस्थायी अस्पतालमा सारिएको थियो । उपचारकै क्रममा शाहको आज बिहान मृत्यु भएको अस्पतालका सूचना अधिकारी दिलिपकुमार श्रेष्ठले पनि पुष्टि गर्नुभयो । शाह नेकपाको गौरीगंगा नगर कमिटीको सचिवालय सदस्य पनि हुनुहुन्थ्यो ।
