समाचार

काठमाडौं। निर्वाचन आयोगले निर्वाचन आचारसंहिता उल्लंघन गरेको आरोपमा नेकपा एकीकृत समाजवादी अध्यक्ष माधवकुमार नेपालसँग स्पष्टीकरण सोध्नुका साथै उनलाई कारबाही गर्न जिल्ला प्रहरी कार्यालय रौतहटका नाममा पत्राचारसमेत गरेको छ । आफूले जितेमा युवालाई वैदेशिक रोजगारीको व्यवस्था गर्ने अभिव्यक्ति दिएको भन्दै रौतहट क्षेत्र नम्बर १ का प्रतिनिधिसभा सदस्य उम्मेदवार नेपालसँग २४ घण्टे स्पष्टीकरण सोधेको आयोगले कारबाहीका लागि रौतहट प्रहरीलाई पत्राचार गरेको हो । रौतहटमा आयोजित कार्यक्रममा अध्यक्ष नेपालले ‘बिना ढेउवा के भिसा मिल्ते है, टिकट मिल्ते है, काठमाडौंमे तालिम मिल्ते है भनी दिएको वक्तव्य सामाजिक सञ्जालमा सार्वजनिक भएको र यस विषयमा आफ्नो गम्भीर ध्यानाकर्षण भएको आयोगमा पत्रमा उल्लेख छ ।

सोहीअनुसार आयोगले कारबाही प्रक्रिया अगाडि बढाउन पनिे रौतहट प्रहरीलाई पत्राचार गरेको हो ।

बारा। कांग्रेसबाट बारा १ मा उम्मेदवार बनेका खानेपानी मन्त्री उमाकान्त चौधरीले चुनाव प्रचारको क्रममा तामागढी-सिम्रौनगढ सडक आफ्नो पहलमा निर्माण भएको दाबी गर्दै हिँड्न थालेपछि विपक्षी पार्टीका नेता कार्यकर्ता रुष्ट बन्न थालेका छन् । खासगरी एमाले नेता कार्यकर्ता चाैधरीकाे गतिविधिप्रति रुष्ट भएका हुन् । बारा जिल्लाको व्यापारिक र सामाजिक दृष्टिले महत्वपूर्ण रहेको यो सडक तत्कालीन प्रतिनिधिसभा सदस्य मुकुन्द न्यौपानेको पहलमा केन्द्रीय योजनामा समावेश भएको थियो । तत्कालिन निर्माण तथा यातायात मन्त्रालयमा सांसद न्यौपानेले दिएको निवेदनको आधारमा मन्त्रालयले तामागढी-सिम्रौनगढ सडकलाई ५ असार २०५२ मा केन्द्रीय योजनामा समावेश गर्ने निर्णय गरेको थियो ।तर कांग्रेसका केही नेताले वन फँडानीको कुरा देखाएर सडक निर्माणमा अवरोध गरेपछि हाल एमालेबाट बारा १ का प्रतिनिधि सभा सदस्यका उम्मेदवार अच्युत मैनालीसहित कोल्हबी क्षेत्रका तत्कालीन जनप्रतिनिधिहरुको सक्रियतामा रुख र बुट्यान फँडानी भएको हो । यसअघिको पुरानो सडक वर्षाको भल पानी बगेर खोल्छी जस्तो गहिरो बनेपछि पुरानो बाटोको छेउबाट पूर्वतर्फ हाल चलनचल्तिमा रहेको नयाँ सडक निर्माण गरिएको हो । कोल्हबी क्षेत्रका हजारौ सर्वसाधारणले घरघरबाट निस्किएर सडक खोलेका हुन् । ठूला रुख जोगाउने क्रममा सो सडकको तामागढी-भलुहीखोर खण्डको जंगल क्षेत्रको केही स्थानमा सडक घुमाउरो बन्न पुगेको हो । सडकको रेखांकनमा परेका झाडी, बुट्यान र केही रुखसमेत स्थानीयले काटेपछि कांग्रेस कार्यकर्ताले मैनालीसहित सांसद न्यौपाने, तत्कालीन जिल्ला विकास समितिका सभापति छठुप्रसाद यादव, छविलाल उप्रेती, तत्कालीन सपही गाविसका अध्यक्ष स्वर्गीय भगवान पौडेल, उपाध्यक्ष रवि चौधरी, कोल्हबीका अध्यक्ष राजहरण चौधरी, रामपूर्वा गाविस अध्यक्ष दामोदर चौधरी, अमावका अध्यक्ष सुरेन्द्र चौधरीलगायत दर्जनौं जनप्रतिनिधि र समाजसेवीविरुद्ध ०५४ सालमा वन मुद्दा दायर गरेका थिए । सोही क्रममा सडक खन्न भनेर विभागबाट ल्याइएको एक थान डोजर तत्कालीन निर्माण तथा यातायातमन्त्री खुमबहादुर खडकाको निर्देशनमा फिर्ता गर्नसमेत लगाइएको थियो ।

वन विभागले जनप्रतिनिधिहरुको सक्रियतामा सडक निर्माणका लागि रुख फँडानी भएको पाइएको भन्दै नचल्ने निर्णय गरेपछि सो मुद्दा पछि निष्क्रिय भएको थियो । सोही समयदेखि  निर्माण प्रक्रियामा रहेको सो सडकको टेडाकट्टी क्षेत्रमा पर्ने करिब पाँच सय मिटर क्षेत्रबाहेक हाल कालोपत्रेसमेत भइसकेको छ। मन्त्री चौधरीले जनतामा भ्रम सृजना गर्न खोजेको स्थानीयले बताएका छन् ।

भैरहवा। गृहमन्त्रीसमेत रहेका का‌ंग्रेस नेता बालकृष्ण खाणले सडकपेटीमै निर्वाचन कार्यक्रम गरेका छन् । पैदल यात्रु तथा सर्वसाधरणका लागि सहजहोस भन्ने हेतुले व्यस्त सडकको छेउछाउ बनाइएको सडकपेटीमै चुनावी कार्यक्रम गरिएकाे हाे ।

सत्ता गठबन्धनको तर्फबाट उम्मेदवार बनेका कांग्रेसका केन्द्रीय सदस्यसमेत रहेका खाणले रुपन्देहीको क्षेत्र नम्बर ३ (भैरहवा)बाट उम्मेदवार बनेका छन् । उनले वडास्तरीय प्रचार प्रसार कार्यालयको उद्घाटन सडकपेटीबाट नै गरेका छन् ।

भैरहवा। गृहमन्त्री बालकृष्ण खाँणले प्रहरी प्रशासनको झुन्ड लिएर मत माग्दै हिँडेका छन् । आउँदो ४ मंसिरमा हुने प्रतिनिधि चुनावका लागि रुपन्देही ३ बाट उम्मेदवार बनेका खाँण भैरहवामा वडास्तरीय प्रचार प्रसार कार्यालयको उद्घाटन गर्न दर्जन बढी प्रहरी लिएर पुगेका हुन् । सत्ता गठबन्धनको तर्फबाट उम्मेदवार बनेका कांग्रेस केन्द्रीय सदस्यसमेत रहेका खाँणकाे सुरक्षामा नेपाल प्रहरी, सशस्त्र प्रहरी, ट्राफिक प्रहरी, राष्ट्रिय अनुसन्धान र सादा पोसाकका सुरक्षाकर्मी गरी दुई दर्जन बढी प्रहरी खटिएका छन् । जिल्ला प्रहरी कार्यालयले प्रहरी निरीक्षकको कमान्डमा गाडीसहित प्रहरी परिचालन गरेको छ भने सशस्त्र प्रहरीको २७ नम्बर गणले पनि सशस्त्र प्रहरी निरीक्षककै कमान्डमा सशस्त्र प्रहरी गाडीसहित छ । ट्राफिक प्रहरी पनि ट्राफिक व्यवस्थापनका लागि खटेको छ ।  बहालवाला मन्त्री भएकाले सरकारले नै व्यक्तिगत सुरक्षाका लागि सुरक्षाकर्मी प्रदान गरे पनि क्षेत्रगत रूपमा जिल्लाबाट पनि कार्यक्रम भएको स्थलमा प्रहरी परिचालन हुँदै आएको छ । घन्टाै‌सम्म हुने कार्यक्रममा सुरक्षाकर्मी क्षेत्र नम्बर ३ का उम्मेदवारसँग सँगै छन् । बहालवाला मन्त्रीले नै निर्वाचन आचारसंहिता २०७९ विपरीत आफ्नै प्रचारप्रसारमा हिँडेका छन्।चुनावको रन्को लागेदेखि मन्त्रालयमा समय नदिई प्रहरीको गाडीसहित प्रचारप्रसारमा मत माग्दै हिँडिरहेका छन् । सरकारी खर्चमा सरकारको गाडी प्रयोग गर्दै प्रचार प्रसारमा मतका लागि अनुरोध गरिरहेका छन् । निर्वाचन मिति तयभएपछि गृहमन्त्रीको ध्यान नेपालतर्फ हुनु पर्नेमा उम्मेदवारी दिएको क्षेत्रमै रहेको छ । ‘उहाँ आउँदा हामीलाई आवागमनमा समस्या भइरहेको छ, प्रहरीले यताबाट नजाउ उताबाट जाऊ भन्दै बाटो देखाइरहेकाे छ । यति नै सुरक्षाको डर छ भने निर्वाचन किन लड्नु भएको हो, सधैं भैरहवामै हिँडिरहँदा हामीलाई सास्ती भएको छ,’ एक बटुवाले भने ।

निर्वाचन आचारसंहिता २०७९ को परिच्छेद २ को ४ (क) मा सरकारी वा अर्धसरकारी निकाय वा सार्वजनिक संस्थाले त्यस्तो निकाय वा संस्थाको वा अन्तर्गतको कुनै परियोजनाको स्रोत साधान र सम्पति कुनै दल वा उम्मेदवारको पक्ष वा विपक्षमा हुने गरी प्रयोग गर्न वा गराउन नहुने उल्लेख छ । त्यस्तै परिच्छेद ३ को दफा ५ क १ को (क)मा प्रतिबन्धाथ्मक वाक्यांशबमोजिम निर्वाचन प्रचार प्रसारमा संलग्न हुने नेपाल सरकार वा प्रदेश सरकारको मन्त्री वा स्थानीय कार्यपालिका पदाधिकारीले निर्वाचन प्रचार प्रसारमा संलग्न हुदा सरकारी स्रोत र साधानको प्रयोग गर्न नहुने छ । तर सरकारकै गाडी रहेको प्रहरीको गाडी प्रयोग भएको छ ।