समाचार

काठमाडौं ।

नेकपा एमालेका नेता ईश्वर पोखरेलले ज्येष्ठ नागरिकका ज्ञानलाई नयाँ पुस्तामा हस्तान्तरण गर्न चुनौती रहेको बताउनुभएको छ । मनमोहन स्मृति प्रतिष्ठानद्वारा आयोजित ‘ज्येष्ठ नागरिकको ज्ञान र सीप हस्तान्तरण’ सम्बन्धी अन्तर्राष्ट्रिय सम्मेलनको समापन कार्यक्रममा बोल्दै यस्तो बताउनुभएको हो । उहाँले बदलिँदो समयमा नयाँ पुस्तामा ज्ञान हस्तान्तरण गर्नु सबैभन्दा ठूलो चुनौती रहेको बताउनु भयो । ज्येष्ठ नागरिकको सम्मान र संरक्षण गर्ने दायित्व सबै पक्षको भएको उहाँले बताउनु भयो । पुराना पुस्ताका ज्ञान र विचारलाई नयाँ पुस्तामा लैजान प्रतिष्ठानले कार्यक्रम सञ्चालन गर्ने उहाँको भनाई छ ।

संघीय सरकार, स्थानीय तह तथा विभिन्न संघ–संस्थासँग सहकार्य गरेर कार्यक्रम सञ्चालन गरिने उहाँले जानकारी दिनुभयो । उहाँकाअनुसार प्रतिष्ठानले व्यवसायिक तथा प्राविधिक शिक्षाको प्रवद्र्धनसँगै ज्येष्ठ नागरिकको सामाजिक सुरक्षा र ज्येष्ठ नागरिक केन्द्रित कार्यक्रमलाई प्राथमिकतामा राखेर काम गर्नेछ । नेता पोखरेलले मनमोहन स्मृति प्रतिष्ठानलाई प्रदेश र जिल्लास्तरमा पनि गठन गर्ने जानकारी दिनुभयो । उहाँले प्रतिष्ठानलाई व्यवस्थित र प्रभावकारी बनाउँदै लोकतान्त्रिक तथा वामपन्थी आन्दोलनमा योगदान पु¥याएका व्यक्तित्वहरूको विचार र योगदानलाई नयाँ पुस्तासँग लैजाने बताउनु भयो । उहाँले मनमोहन अधिकारीले ज्येष्ठ नागरिकहरुका लागी अगाडी सारेको सामाजिक सुरक्षा भत्तासम्बन्धी योजना हाल प्रभावकारी भएको पनि स्मरण गराउनु भयो । शनिवारदेखि शुरु भएको अन्तर्राष्ट्रिय सम्मेलन आईतवार सकिएको हो । –

काठमाडौं ।

नेपाली प्रहरीका प्रमुख (आइजीपी) दानबहादुर कार्कीले नेपालको जटिल भूगोल र अव्यवस्थित सडक संरचनाका कारण सवारी दुर्घटना बढ्दै गएको बताउनुभएको छ ।नेपाल यातायात व्यवसायी राष्ट्रिय महासंघको सातौँ राष्ट्रिय महाधिवेशनमा उहाँले जटिल भुगो र देशभर जथाभावी निर्माण गरिएका सडक तथा कमजोर इन्जिनियरिङ संरचनाले दुर्घटनाको जोखिम थप बढाएको बताउनुभएको हो । उहाँले नेपालमा सवारी दुर्घटनाबाट हुने मानवीय क्षति अत्यन्त दुःखद् बन्दै गएको भन्दै दैनिक औसतमा आठ जनासम्मको मृत्यु हुने अवस्था सिर्जना हुनु गम्भीर चिन्ताको विषय भएको बताउनु भयो ।

कार्कीले सवारी दुर्घटना राज्य, व्यवसायी, मजदुर युनियन तथा सम्पूर्ण नागरिकको साझा चिन्ताको विषय भएको उल्लेख गर्दै यसलाई न्यूनीकरण गर्न सबै पक्ष जिम्मेवार बन्नुपर्ने बताउनुभयो । उहाँले यातायात व्यवसायीको महाधिवेशनले पनि दुर्घटना न्यूनीकरणका लागि स्पष्ट मार्गनिर्देशन र दिशा तय गर्नुपर्ने बताउनु भयो । उहाँकाअनुसार पछिल्ला वर्षहरूमा जलवायु परिवर्तनको प्रभावका कारण नेपालमा बाढी, पहिरो तथा मनसुनजन्य विपद् बढ्दै गएका छन्, जसले सवारी दुर्घटनाको जोखिम थप बढाएको छ । विशेषगरी चाडपर्वको समयमा भएका ठूला दुर्घटनाले मानवीय क्षतिसँगै राष्ट्रलाई ठूलो आर्थिक नोक्शानी पनि व्यहोर्नुपरेको छ ।

आइजीपी कार्कीले दुर्घटनाका कारण केवल मानवीय कमजोरी मात्र नभई इन्जिनियरिङ पक्ष पनि उत्तिकै जिम्मेवार रहेको बताउनु भयो । गाउँ–गाउँमा योजनाविहीन रूपमा डोजर प्रयोग गरेर बनाइएका सडकले दुर्घटना निम्त्याएको उल्लेख गर्दै उहाँले यस्ता सडकको प्राविधिक गुणस्तर तथा वातावरणीय प्रभावको गम्भीर समीक्षा आवश्यक रहेको बताउनु भयो ।जलवायु परिवर्तन, कमजोर सडक संरचना, लापरवाही, अज्ञानता र कानूनी कार्यान्वयनको कमजोरीलाई दुर्घटनाका प्रमुख कारणका रूपमा औंल्याउँदै सुरक्षित यातायात प्रणाली निर्माणमा राज्यले दीर्घकालीन नीति अवलम्बन गर्नुपर्नेमा उहाँको जोड थियो ।

काठमाडौं ।

काठमाडौं उपत्यका ट्राफिक प्रहरी कार्यालयले डिजिटल प्रविधिमार्फत ट्राफिक व्यवस्थापन गर्ने तयारी गरिरहेको जनाएको छ । कार्यलयले ट्राफिक नियम उल्लंघन गर्नेहरुलाई सिसिटिभी निगरानीमार्फत कारबाही गर्नेगरि तयारी गरेको हो । परीक्षण स्वरुप कार्यलयले काठमाडौको थापाथली क्षेत्रमा ‘फेसलेस ट्राफिक म्यानेजमेण्ट सिस्टम’ लागू गरिसकेको कार्यलयका प्रमुख प्रहरी वरिष्ठ उपरीक्षक नवराज अधिकारीले जानकारी दिनुभयो । कार्यलयले आईतवार आयोजना गरेको समिक्षात्मक कार्यक्रममा उहाँले सार्वजानिक विदाको दिन थापाथली क्षेत्रमा हाल सिसिटिभी निगरानीमार्फत नियम उल्लंघन गर्नेलाई कारबाही गर्ने गरिएको बताउनु भयो ।

उहाँकाअनुसार ट्राफिक नियम उल्लंघन, मापसे, तिब्र गति र लेन अनुशासनविरुद्ध कार्यलयले कडा कारबाही गर्ने गरेको छ । ट्राफिक प्रहरीले लेन अनुशासन, ट्राफिक लाइट पालना, ‘ड्रिङ्क एण्ड ड्राइभ’ र ‘ड्रग्स एण्ड ड्राइभ’ नियन्त्रणलाई प्राथमिकतामा राखेको उहाँले बताउनु भयो । ओभरस्पिड नियन्त्रण र सडक सुरक्षालाई केन्द्रमा राखेर काठमाडौंको ट्राफिक जामलाई व्यवस्थित गर्न ‘डेस्टिनेसन क्लियर’ प्रणाली लागू गरेको उहाँले जानकारी दिनुभयो । उहाँकाअनसार सार्वजानिक यातयातलाई मर्यादित बनाउन सवारीसाधनमा सिसिटिभी, ड्यास क्यामेरा र जीपीएस अनिवार्य गरिएको छ । ती उपकरण नराख्ने सवारीलाई सञ्चालन गर्न रोक लगाउने उहाँले बताउनु भयो । राइड शेयर सेवामा प्रयोग हुने मोटरसाइकलमा समेत एसओएस बटन र क्यामेरा अनिवार्य बनाउन लागिएको उहाँले जानकारी दिनुभयो । ट्राफिक प्रहरीले लापरवाहीपूर्वक सवारी चलाउने ३१ चालकको लाइसेन्स ६ महिनाको लागि निलम्वन गरेको छ । लाइसेन्स निलम्वनका लागि यातायात व्यवस्था कार्यालयले निलम्वन गरिसकेको उहाँले जानकारी दिनुभयो । पटक–पटक नियम उल्लंघन गर्नेलाई सजग गराउन निलम्वन गरिएको उहाँले बताउनु भयो ।

उहाँले एकीकृत बसपार्क प्रणाली लागू गरि बसपार्कबाट मात्रै लामो दूरी र मझौला दूरीका सवारी साधनहरू छुट्ने व्यवस्था गरिएको पनि जानकारी दिनुभयो । जेनजी आन्दोलनमा क्षति पुगेको विभिन्न ३७ वटा ट्राफिक प्रहरी कार्यालयहरूलाई मर्मत गर्दै ट्राफिक व्यवस्थापनलाई अझ सशक्त रूपमा अगाडि बढाएको उहाँको भनाई छ ।

२६ करोड १९ लाख रुपैयाँभन्दा बढी राजश्व संकलन
कार्यलयका सूचना अधिकारी प्रहरी उपरीक्षक नरेशराज सुवेदीले चालु आर्थिक वर्षमा ट्राफिक प्रहरीले ३ लाख ७३ हजार ५ सय ६२ चालकलाई कारबाही गरेको जानकारी दिनुभयो । त्यसबाट २६ करोड १९ लाख रुपैयाँभन्दा बढी राजश्व संकलन भएको उहाँले बताउनु भयो । सबैभन्दा बढी कारबाही मोड्न निषेध गरिएको ठाउँमा उल्लंघन गर्ने ३७ हजार ४७२, लेन अनुशासन उल्लंघन गर्ने २३ हजार ९८४, मापसेमा परेका २३ हजार ४८, तीव्र गतिमा सवारी चलाउने २३ हजार ७७२ र रातो बत्ती उल्लंघन गर्ने २८ हजार ३०८ जनामाथि कारबाही गरिएको उहाँले जानकारी दिनुभयो । यस्तै, इ–चलान प्रणालीमार्फत मात्रै ४ करोड २८ लाख रुपैयाँभन्दा बढी राजस्व संकलन भएको बताउनुभयो । जरिवाना नतिर्ने २ लाख ६१ हजार चालकको विवरण थप कारबाहीका लागि यातायात व्यवस्था विभागमा पठाइएको उहाँको भनाई छ । उहाँकाअनुसार १८ करोड रुपैयाँभन्दा बढी कारबाहीको जरिवाना बापतको शुल्क उठ्न बाँकी रहेको छ । उहाँले पछिल्लो समय तोकिएकोभन्दा बढी भाडा असुल्ने प्रवृत्ति बढेपछि निगरानी र कारबाही तीव्र बनाइएको पनि जानकारी दिनुभयो । पुराना तथा प्रदुषण फैलाउने सवारीसाधनमाथि यान्त्रिक परीक्षण र प्रदुषण जाँच कडाइ गरिएको उहाँको भनाई छ ।

काठमाडौं ।

काठमाडौं उपत्यकाका विभिन्न स्थान र मितिमा चोरी भएका ७३ ओटा मोटरसाइकल र स्कुटर सम्बन्धित धनीले फिर्ता पाएका छन् । काठमाडौं उपत्यका ट्राफिक प्रहरी कार्यालयले आईतवार एक कार्यक्रम गरी खोजतलासपछि फेला परेका मोटरसाइकल र स्कुटर सम्बन्धित धनीलाई हस्तान्तरण गरेको हो । कार्यालयका प्रमुख, प्रहरी वरिष्ठ उपरीक्षक नवराज अधिकारीले वैशाख महिनामा चोरी भएका ६५ वटा मोटरसाइकल र स्कुटर सम्बन्धित धनीलाई हस्तान्तरण गरिएको बताउनु भयो ।

उहाँकाअनुसार उपत्यका ट्राफिक प्रहरी कार्यालयले यसअघि नै ८ वटा मोटरसाइकल समेत सम्बन्धित धनीलाई हस्तान्तरण गरिसकिएको बताउनु भयो । कार्यालयमा प्राप्त निवेदन र अन्य माध्यमबाट प्राप्त सूचनाका आधारमा खोजी गर्दा केही वास्तविक नम्बर प्लेट र केही नक्कली नम्बर प्लेट राखेर चलाइरहेको अवस्थामा पारी फिर्ता गरिएको बताउनु भयो । उहाँले सवारी चोरी हुनबाट बच्न जिपिएस जडान गर्न तथा सही ठाउँमा पार्किङ गर्न समेत सबैलाई आग्रह गर्नुभयो ।