काठमाडौं, ११ चैत । आज रामनवमी चैत्र शुक्ल पक्ष नवमीका दिनलाई हिन्दु धर्मावलम्बीले मर्यादा पुरुषोत्तम भगवान् श्रीरामचन्द्रको जन्मदिनका रुपमा धुमधाम साथ मनाउने चलन छ ।
रामनवमीका अवसरमा विहानैदेखि देशभरका राम मन्दिरमा भक्तालुहरुको भीड लागेको छ । वैदिक सनातन धर्म अनुसार भगवान् रामको जन्मदिनमा उनका भक्तिभाव गर्नाले सत्कर्म मिल्ने विश्वास छ । त्रेता युगमा मर्यादा पुरुषोत्तमका रूपमा सुपरिचित राम सूर्यवंशी राजा दशरथले गरेको पुत्रेष्टि यज्ञको प्रसादस्वरूप दशरथकी जेठी रानी कौशल्यावतीको गर्भबाट जन्मिएका हुन् ।
राम नवमीका अवसरमा नेपालको जनकपुर र भारतको अयोध्यामा रामलीला प्रदर्शन गरिन्छ । रामनवमीका दिन देवी पूजा गरी रामचन्द्रको पूजापाठ एवम् आराधना गरेमा ‘श्री’ प्राप्त हुने शास्त्रीय मान्यता छ । राम नवमीको उपलक्ष्यमा सरकारले सार्वजनिक विदा दिएको छ ।
