काठमाडौं, २२ फागुन । राष्ट्रपतिको उम्मेदवार चयनका विषयमा छलफल गर्न नेकपा एमालेकाे स्थायी कमिटी बैठक जारी छ । प्रधानमन्त्री निवास बालुवाटारमा जारी बैठकमा वर्तमान राष्ट्रपति विद्यादेवी भण्डारीलाई नै निरन्तरता दिने वा नयाँ उम्मेदवार अघि सार्ने भन्नेबारे छलफल भइरहेको नेताहरुले बताएका छन् ।
संसद्मा एमाले र माओवादी केन्द्रको बहुमत रहेकोमा दुई पार्टीबीचको भागबण्डामा राष्ट्रपति एमालेको भागमा परेको छ । राष्ट्रपति भण्डारीले दोहोरिने इच्छा व्यक्त गर्दै आएकी छन् ।
एमालेमा वरिष्ठ नेता झलनाथ खनालले पनि राष्ट्रपति बन्ने इच्छा सार्वजनिक रुपमा नै व्यक्त गर्दै आएका छन् । निर्वाचन आयोगले फागुन २९ गते राष्ट्रपति निर्वाचनको मिति तोकेको छ । त्यसका लागि भोलि उम्मेदवारी दर्ताको समय तोकेकाले एमालेले आजै उम्मेदवारको टुंगो लगाउन लागेको हो ।
