गाजा पट्टीका स्वास्थ्य अधिकारीहरूले तीन वर्ष मुनिका बालबालिकालाई लक्षित गरी खोप अभियान शुरु गरेका छन् । जसको उद्देश्य युद्धका कारण दुई वर्षदेखि खोप सेवा अवरुद्ध भएपछि संक्रामक रोगहरूको प्रकोप रोक्नु हो । गाजाका स्वास्थ्य अधिकारीहरूले संयुक्त राष्ट्र बाल कोष र विश्व स्वास्थ्य संगठनको सहयोगमा संयुक्त राष्ट्र संघको राहत तथा कार्य एजेन्सी फर प्यालेस्टाइन शरणार्थी र प्यालेस्टिनी रेड क्रिसेन्ट सोसाइटीसँगको समन्वयमा पट्टीभरिका १ सय ५० स्वास्थ्य केन्द्रहरूमा अभियान सञ्चालन भइरहेको बताएका छन् । अधिकारीहरूले यो अभियान १० दिनसम्म चल्ने र अक्टोबर २०२३ मा युद्ध शुरु भएदेखि नियमित खोपहरू छुटेका बालबालिकाहरूसम्म पुग्न तीन चरणमा लागू गरिने बताएका छन् ।
प्रत्येक चरणमा एक महिना छुट्याइएको छ । गाजा शहरको अल–सराया फिल्ड अस्पतालका मेडिकल निर्देशक सलीम अल–किर्मकाअनुसार गाजाका लगभग ४५ हजार बालबालिकाले विगत दुई वर्षमा आवश्यक खोपहरू पाएका छैनन् । खोपले बालबालिकाहरूलाई स्वास्थ्य प्रणालीमा पतन वा अवरोध ल्याउने सबै रोगहरूबाट जोगाउँछ । विशेष गरी पोलियो, डिप्थेरिया र अन्य रोकथाम गर्न सकिने रोगहरू रोक्छ । यी खोपहरू लामो समयदेखि उपलब्ध छैनन् ।
