काठमाडाैं । उपत्यकाको निकै व्यस्त सडक मध्ये ललितपुरको ग्वार्को चोकमा फ्लाई ओभरमा आजदेखि सञ्चालनमा आउँदै छ । पटक–पटक भाका सार्दै सम्पन्न भएको ‘फ्लाई ओभर’ आज प्रधानमन्त्री केपी शर्मा ओलीले उदघाटन गर्दै हुनुहुन्छ ।
फ्लाई ओभर बन्ने क्रममा ३९ महिनादेखि सास्ती खेपेका नागरिक अब भने ट्राफिक जामको समस्याबाट मुक्त हुने विश्वासमा छन् । भौतिक पूर्वाधार तथा यातायात मन्त्रालय, सडक विभागअन्तर्गत गुणस्तर अनुसन्धान तथा विकास केन्द्रले दुई वर्षभित्र काम सक्ने गरी ०७८ साल फागुन १२ गते आशिष–समानान्तर रेलिगेर जेभी निर्माण व्यवसायी कम्पनीसँग ठेक्का सम्झौता गरेर २ वर्षमा सक्ने भनिए पनि पटक-पटक म्याद थपेर अहिले ‘फ्लाई ओभर’ तयार भएको हो ।
पटक–पटक म्याद थप गर्दा पनि काम पुरा नभएपछि अहिलेसम्मको झन्डै एक करोड ४७ लाख रुपैयाँ हर्जना तिराएर निर्माण सम्पन्न गरिएको हो । समयमा काम पुरा हुन नसक्दा शुरूको सम्झौताभन्दा १४ करोड रुपैयाँ लागत थप भएको छ ।
उपत्यका ट्राफिक प्रहरी कार्यालयले पछिल्लो समय गाडीको बढ्दो चापसँगै उपत्यकाका विभिन्न चोकमा बढ्दै गरेको जामको समस्या यस्ता फ्लाई ओभरबाट कम हुने विश्वास गरेको छ । उपत्यकालगायतका अन्य शहरका मुख्य चोकमा पनि यस्ता ओरपास र अन्डरपासको योजना बनाउन आवश्यक रहेको ट्राफिक प्रहरीको सुझाव छ ।
