२०८१,१०,१६
तनहुँको व्यास नगरपालिका–८ पुलिमराङस्थित शहीद स्मारक कोष समितिले शहीद पार्कको विकासका लागि सहयोग गर्न राष्ट्रपति रामचन्द्र पौडेलसमक्ष आग्रह गरेको छ। शहीद दिवसको अवसरमा आज पुलिमराङ आइपुगेका राष्ट्रपति पौडेललाई ज्ञापनपत्र बुझाउँदै समितिले यस क्षेत्रको समग्र विकासका लागि सरकारको ध्यानाकर्षण गराइदिन आग्रह गरेको हो। बृहत् गुरुयोजनाअनुसार शहीद पार्कको सर्वाङ्गीण विकासका लागि १५ करोड रुपैयाँ बजेट चाहिने देखिएकाले बजेट विनियोजनका लागि पहल गरिदिन राष्ट्रपति पौडेलसमक्ष आग्रह गरिएको समितिका अध्यक्ष एकबहादुर गुरुङले जानकारी दिए।
शहीद स्मारक पार्क तथा पुलिमराङको वर्तमान अवस्थाका बारेमा राष्ट्रपति पौडेल जानकार रहेको उल्लेख गर्दै अध्यक्ष गुरुङले यस क्षेत्रको विकास निर्माणअन्तर्गत पक्की सडक, बिजुलीको स्तरीय व्यवस्थापन, पर्यटकीय सम्भावना, कृषि एवं आयआर्जनका विषयमा स्थानीयलाई देखिने गरी विकास निर्माणका लागि सरकारसँग सहयोग उपलब्ध गराउने सन्दर्भमा राष्ट्रपति पौडेलको ध्यानाकर्षण गरे। शहीद दिवसका अवसरमा शहीदहरुप्रति श्रद्धाञ्जली अपर्ण गर्न आजै पुलिमराङस्थित शहीद पार्क आइपुगेका राष्ट्रपति पौडेललाई जिल्लास्थित कार्यालय तथा सुरक्षा निकायका प्रमुख, राजनीतिक दलका नेता तथा कार्यकर्ता र स्थानीय जनताले स्वागत गरेका थिए।
सो अवसरमा राष्ट्रपति पौडेल र प्रथम महिला सविता पौडेलले पुलिमराङस्थित शहीद पार्कमा रहेका शहीदहरुको शालिकमा माल्यार्पण गरेको प्रमुख जिल्ला अधिकारी श्यामकृष्ण थापाले जानकारी दिए। तनहुँको सदरमुकाम दमौलीबाट उत्तरतर्फ करिब ४० किलोमिटर टाढा पुलिमराङस्थित शहीद पार्कमा भरत गुरुङ, शमशेरबहादुर गुरुङ, लालध्वज गुरुङ, धर्मध्वज गुरुङ, सर्वसिंह गुरुङ र हस्तवीर गुरुङको लहरै अर्धकदको प्रतिमा छन्।
जहाँनिया राणाशासन र निर्दलीय पञ्चायती व्यवस्थाविरुद्धको आन्दोलनमा ज्यान गुमाएका उल्लिखित शहीदहरूको जन्म पुलिमराङमा भएको हो। यसै सन्दर्भमा शहीद स्मारक कोष समिति २०५१ सालमा स्थापना भएको र २०६६ सालमा ६ जना शहीदको अर्धकदको सालिक राखिएको समितिले जनाएको छ।
