२०८१ श्रावण १३ आज विश्व हेपाटाइटिसविरुद्धको दिवस नेपालमा पनि विभिन्न जनचेतनामूलक कार्यक्रम गरी मनाइँदैछ ।
हरेक वर्ष जुलाई २८ मा हेपाटाइटिसविरुद्धको दिवस मनाउने गरिन्छ । यो वर्षका लागि ‘यो काम गर्ने समय हो’ भन्ने अन्तराष्ट्रिय नारा तय गरिएको छ ।
हेपाटाइटिस भन्नाले विभिन्न संक्रमणका कारण कलेजोमा सुन्निने अवस्थालाई बुझिने चिकित्सकहरुले बताएका छन् ।
कलेजोमा ‘हेपाटोट्रोपिक भाइरस’ का कारण हुने संक्रमणलाई भाइरल हेपाटाइटिस भनिन्छ । हेपाटाइटिस ‘ए’ देखि ‘इ’ सम्म गरी पाँच प्रकारका हुने चिकित्सकहरुको भनाई छ ।
तुलनात्मक रुपमा हेपाटाइटिस ‘बी’ र हेपाटाइटिस ‘सि’ बढी घातक हुने गर्छ । ज्वरो आउनु, शरीर पहेँलो हुनु, वाकवाकी, लाग्नु, खान मन नलाग्नु, जिउ दुख्नु, अत्याधिक थकान महसुस हुनु, पिसाब पहेलो हुनु, पेट दुख्नु आदि यो रोगका लक्षणहरु रहेका छन् ।
चिकित्सकहरुका अनुसार दुषित पानी तथा खानेकुराको सेवन गर्नाले, सरसफाइमा ध्यान नदिनाले, विषाक्त सुईको प्रयोग, असुरक्षित शारिरिक सम्बन्ध लगायतका कारण यो रोग सर्ने गर्दछ ।
विश्व स्वास्थ्य संगठनका अनुसार हेपाटाइटिस सम्बन्धि रोगबाट विश्वमा प्रत्येक एक सेकेन्डमा एक व्यक्तिको मृत्यु हुने गरेको छ ।
हेपाटाइटिस बी र सीबाट मात्रै हरेक वर्ष ११ लाख मानिसको मृत्यु हुने गरेको र २ दशमलब २ मिलियन नयाँ विरामी थपिने गरेका विश्व स्वास्थ्य संगठनको तथ्यांक छ । ०००
