एजेन्सी , ६ असार । सीमा तनावसँगै भारतले चीनसँग नजिक पर्ने हवाइ आधार शिविरहरुमा आफ्ना लडाकु विमान र हेलिकप्टरहरूको तैनाथी बढाएको छ । लद्दाखको सीमाक्षेत्रमा चिनीयाँ सैनिकसँगको झडपमा २० जना भारतीय सैनिकको मृत्यु भएपछि बढ्दो आपसी तनावकाबीच भारतले चीनसँग नजिक पर्ने शिविरहरुमा लडाकु विमान र हेलिकप्टरहरूको तैनाथी बढाएको हो ।
यसैगरी भारतले बंगालको खाडी क्षेत्रमा थप युद्धपोतहरू पठाएको भारतीय संचार माध्यमहरुले जनाएका छन् । लडाकु विमानको तैनाथी बढाएर भारतले बेइजिङलाई सीमा तनाव बढ्दै गएमा हुनसक्ने सम्भावित भिडन्तका लागि तयार रहेको संकेत दिएको विश्लेषकहरुको भनाई छ ।
भारतले ती क्षेत्रमा आकाशबाट जमिनमा रहेका ट्यांकमा रकेट र मिसाइलले हमला गर्नेसक्ने अपाचे हेलिकप्टर, उच्च उचाइमा भारी वजन उठाउन तथा सैनिक ओसार्न सक्षम चिनोक हेलिकप्टरहरूको संख्या बढाएको छ ।
चीनले पनि तिब्बतको होतान, कस्गर क्षेत्रको एयरवेसमा जे–११ र जे–९ लडाकू विमान र लामो दुरीसम्म बम प्रहार गर्नसक्ने हतियारहरूको तैनाथी बढाएको समाचार छ ।
