काठमाण्डौँ, २ असोज । नेपाल कम्युनिष्ट पार्टी माओवादी (क्रान्तिकारी)का अध्यक्ष मोहन वैद्यले माओवादी केन्द्रका अध्यक्ष पुष्पकमल दाहाल प्रचण्ड कम्युनिष्ट नभएको जिकिर गरेका छन् ।
भरतपुर विमानस्थलमा सञ्चारकर्मीहरुसँग कुरा गर्दै अध्यक्ष वैद्यले माओवादी केन्द्र नाममात्रैका कम्युनिष्ट भएको टिप्पणी समेत गरेका छन् । वैद्यले भने ‘प्रचण्ड कम्युनिष्ट होइनन् उनी देखेर माया लाग्छ ।’
त्यस्तै उनले कम्युनिष्ट आचरणबाट च्यूत भएको माओवादी केन्द्रसँग कुनै पनि हालतमा पार्टी एकता हुन नसक्ने पनि बताए ।
प्रचण्ड पश्चगामी दिशामा गइसकेको भन्दै नेता वैद्यले भने ‘माओवादीहरु भन्दा उनका लागि कांग्रेस प्रिय भैसक्यो, कांग्रेससँग बाटो सोझाउँदै छ माओवादी केन्द्र ।’
देउवा-प्रचण्डको सरकारलाई उनले ‘पुरानो खिचडी’को संज्ञा समते दिए ।
